Fransiya hukumati atmosferaga karbonat angidrid ajralishni kamaytirish maqsadida barcha qisqa masofali ichki reyslarni taqiqladi, deb xabar bermoqda BBC.
Poyezdda ikki yarim soat ichida borish mumkin bo‘lgan yo‘nalishlarda aviareyslarni bekor qilish taklifiga qonunchilar ikki yil avval ovoz bergan edi. Endi samolyotlar, masalan, Parijdan Nant, Lion yoki Bordoga uchmaydi, biroq taqiq tanqidchilari buni ramziy deb atamoqda.
Airlines for Europe (A4E) sanoat guruhi rahbari vazifasini bajaruvchi Loran Donselning AFP’ga aytishicha, bunday reyslarni taqiqlash CO2 ajralishiga minimal ta’sir qiladi. Uning so‘zlariga ko‘ra, hukumat bunday taqiqlar o‘rniga ushbu muammoni hal qilishda yanada real yondashuvlarni qo‘llab-quvvatlashi kerak.
Koronavirus pandemiyasi butun dunyo bo‘ylab aviakompaniyalarga katta ta’sir ko‘rsatdi. Barcha tijoriy reyslarni kuzatib boradigan Flightradar24 veb-saytida aytilishicha, o‘tgan yilgi parvozlar soni 2019-yildan oldingi bilan solishtirganda 42 foizga kamaygan.
2019-yilda Emmanuel Makron tomonidan yaratilgan, Fransiya jamoatchiligining 150 vakili tomonidan imzolangan Iqlim bo‘yicha Fuqarolik konvensiyasida poyezd bilan 4 soat ichida yetib borish mumkin bo‘lgan manzillarga reyslarni taqiqlashni taklif qilingan edi. Biroq ayrim hududlar va Air France-KLM aviakompaniyasi e’tirozlaridan so‘ng, bu muddat ikki yarim soatga qisqartirildi.
Izoh (0)