Австриянинг Браунау шаҳридаги Адолф Гитлер туғилган уйда келгусида полиция учун инсон ҳуқуқлари бўйича тренинглар ўтказилади, деб хабар бермоқда маҳаллий ОRF телеканали.
Хабарга кўра, бинони полиция эҳтиёжларига мослаштириш учун уни реконструкция қилиш ишлари кузда бошланиши режалаштирилган. Уйнинг тақдири билан шуғулланувчи экспертлар комиссияси уни бузиш ёки пойдеворига ёдгорлик ўрнатишдан бош тортган.
Уйни нима қилиш ҳақидаги мунозаралар узоқ вақт давом этган. Австрия ҳукумати уй эгаси Герлинде Поммер билан кўп йиллик келишмовчиликлардан сўнг 2016 йилда уйни ўз назоратига олди. Поммерлар оиласи уйга қарийб бир асрдан бери эгалик қиларди — уйдан ногиронлар учун марказ сифатида фойдаланилган ва Поммерга ойига 5 000 евродан тўланган.
2019 йилда уй ҳукумат мулкига ўтди ва эгасига 810 минг евро миқдорида товон пули берилди. Мамлакат Ички ишлар вазирлиги бинони полиция бўлимига айлантирмоқчи эканини маълум қилди. Вазирликнинг таъкидлашича, “уйдан келажакда полиция эҳтиёжлари учун фойдаланиш бу бино бошқа ҳеч қачон миллий социализмни эслатмаслигини аниқ қилиб ифодалаши лозим”.
Гитлер 1889 йилда Германия чегарасига яқин жойлашган Браунау шаҳрида туғилган, уч ёшга тўлганда унинг оиласи шаҳардан кўчиб кетган.
1938 йилда у Германияда ҳокимият тепасига келганида, нацистлар уйни сотиб олишган. 1952 йилда, диктатор вафотидан етти йил ўтгач, уй ўзининг дастлабки эгаларига қайтарилди.
Изоҳ (0)