АҚШнинг Техас штати, Даллас шаҳрида дастурий таъминот ишлаб чиқарувчи миллионер Брайан Жонсон яна ўсмирларга хос танага эга бўлишни мақсад қилган. “Биологик ёшни пасайтириш” учун у ҳар йили тахминан 2 миллион доллар сарфлайди.
Жонсоннинг бойлиги тахминан 400 миллион долларга баҳоланган. У кексайишга қарши янги жараённи ишлаб чиқишга умид қилмоқда. Жараёнда унинг барча аъзолари, жумладан тери, мия ва юракни 18 ёшдаги ҳолатига келтириш мақсад қилинган.
Миллионер энг замонавий тиббий текширувлар ва муолажаларга, унинг танасини юқори формада ушлаб туриш учун мукаммал овқатланиш, уйқу ва жисмоний машқлар тартибини ишлаб чиқадиган мутахассисларга ва буни амалга оширишда ёрдам берадиган шифокорлар жамоасига катта миқдорда пул сарфлайди.
Жараён кунига бир соатлик жисмоний машқлар (ҳафтада уч марта юқори интенсив машғулотлар билан), роппа-роса 1977 калорияли диета, ҳар кеча бир хил вақтда ухлаш ва барча турдаги тиббий муолажаларни ўз ичига олади.
Миллионер янги жараёнга ўзининг 17 ёшли ўғли Талмажни ҳам қўшди. У ўзига қуйиш учун ўғлининг қон плазмасидан фойдаланмоқда.
Плазма қуйиш одатда жигар касаллиги, қон ивишининг етарли эмаслиги ёки куйиш каби касалликларга чалинган беморларни даволаш учун қўлланади. Бироқ миллионер ёш йигитнинг қон плазмаси унинг танасини ёшартириши мумкинлигига ишонмоқда. Ушбу процедура минглаб долларга тушади.
Озиқ-овқат ва фармацевтика идораси одамларни кексайишга қарши курашишда плазмадан фойдаланиш хавфидан огоҳлантирган, чунки жараённинг клиник фойдаси тасдиқланмаган.
“Умид шаҳри” миллий тиббиёт маркази биокимёгар Чарльз Бреннернинг айтишича, жараён исботланмаган ва нисбатан хавфли: “Биз бу усул инсонни ёшартириш учун яроқли ёки йўқлигини етарлича ўрганганимиз йўқ”.
Брайан Жонсоннинг ўзи эса плазма қуйиш пайтида олинган маълумотларнинг натижаларини яқин ойларда эълон қилишни режалаштирмоқда.
Изоҳ (0)