Украина ҳукумати баҳорги қарши ҳужумга оид махфий маълумотлар яна тарқалиб кетиб, жанг майдонида Киев позициясини хавф остига қўйиши мумкинлиги сабаб уларни ғарбдаги иттифоқчиларидан сир тутмоқда. Бу ҳақда Politico нашри европалик икки амалдорга таяниб, хабар берди.
АҚШ Миллий гвардияси Ҳарбий-ҳаво кучларининг хизматчиси Жек Тейшейра Украинанинг жанговар ҳаракатларига оид батафсил, жумладан, украин қўшинларининг позицияси ва қурол-яроқ захираси, шунингдек, йўқотишларига оид Америка разведкасининг махфий маълумотларини тарқатганликда гумонланмоқда. Америка ҳукумати бир неча кун давомида Киев ва Европадаги иттифоқчиларини бундай ҳолатлар келажакда қайтарилишининг олдини олиш бўйича керакли чораларни кўрганига ишонтирган.
Шунга қарамай, Украина жанговар ҳаракатларини режалаштиришга боғлиқ кенг маълумотлар тақдим этилишининг олдини олишга интилмоқда. Манбаларга кўра, Киев 2022 йилдан бери ўзига ҳарбий ёрдам кўрсатаётган АҚШ ва Европа давлатлари билан фақат айрим асосий разведка маълумотларини бўлишмаяпти.
Газета суҳбатлашган украиналик депутатнинг сўзларига кўра, юқори мартабали амалдорлар қарши ҳужумга тайёргарликка оид маълумотларни ҳатто украин сиёсатчиларига ҳам айтмаган, “мамлакатда мазкур режадан фақат бир неча киши хабардор”.
АҚШ Мудофаа вазирлиги вакиллари Пентагон бирор-бир ўзгаришни сезмаганини, Вашингтон ва Киев олдинги даражада маълумотлар алмашаётганини маълум қилган. Жо Байден администрацияси эса Украина олдин ҳам ўз режаларини тўлиқ ошкор этмаганини қайд этди.
АҚШ Миллий хавфсизлик кенгаши вакили Жон Кирби журналистлар билан суҳбатда Киев ўз режалари ҳақида Вашингтонга маълумот беришга мажбурлигини айтган. Унинг сўзларига кўра, АҚШ Украинага реал вақт режимида разведка маълумотларини беришни давом этмоқда.
Россиянинг Украинага сўнгги ҳужумлари ва оқибатлари
1 майга ўтар кечаси Россия қўшинлари Украинага навбатдаги ракета ҳужумини уюштирди. Украина қуролли кучлари қўмондонлиги 18 та ракетадан 15 тасини уриб туширганини маълум қилди. Днепропетровск вилоятидаги Павлоград шаҳрининг ўққа тутилиши оқибатида икки киши ҳалок бўлди, 40 киши яраланди. Ўнлаб уйлар вайрон бўлган.
28 апрелга ўтар кечаси Россия армияси Днепропетровск, Черкас ва Киев вилоятларидаги шаҳарларга ракета ҳужуми уюштирди. Украина қуролли кучлари маълумотларига кўра, 23 та ракетадан 21 таси уриб туширилган. Уман шаҳридаги кўп қаватли турар жой биносига ракета тушиши оқибатида 23 киши, жумладан, олти бола ҳалок бўлган.
Изоҳ (0)