Бухоро вилоятида ноқонуний ер олди-сотдиси билан шуғулланган шахслар қўлга олинди, деб хабар беради вилоят ИИБ ахборот хизмати.
Маълум қилинишича, Бухоро тумани “Гулшанобод” маҳалласида яшовчи 50 ёшли Х.Т. Пешку тумани “Пешку” маҳалласида яшовчи 42 ёшли Ж.З.ни алдаб, “Шергирон” маҳалласида жойлашган 1,5 гектар боғ майдонини ўзига тегишли эканини айтган. У ерни ҳужжатлаштириб бериш эвазига 42 минг АҚШ доллари талаб қилган.
13 апрель куни Бухоро вилояти ИИБ ТҚХ ЖҚБ ходимлари томонидан ўтказилган тезкор тадбир давомида фуқаро Х.Т. Бухоро шаҳар ҳудудида жойлашган “Карвон бозори” яқинида 10 минг АҚШ долларини фирибгарлик йўли билан олаётган вақтда қўлга олинган.
Шунингдек, Бухоро шаҳар “Р.Ҳамроев” маҳалласида яшовчи 69 ёшли С.Қ. 2023 йилнинг январь ойида таниши Бухоро тумани “Работ” маҳалласида яшовчи 60 ёшли Т.Б. билан ўзаро жиноий тил бириктиргани аниқланган.
У Бухоро тумани “Арабхона” маҳалласида яшовчи 36 ёшли Ҳ.А. билан Когон тумани Гулистон массиви ҳудудида учрашиб, мазкур ҳудудда жойлашган аслида ўзига тегишли бўлмаган, бирор ҳужжатларсиз фойдаланиб келаётган 3 гектар сув ҳавзаси ва 7 гектар беда экилган ер майдонини ўзига тегишли эканини айтган.
Ерларни Ҳ.А. номига қонуний расмийлаштириб бериш эвазига 4 минг АҚШ доллари талаб қилиб, келишилган пулдан 1 000 долларни олган ва уни ўз эҳтиёжлари учун ишлатиб юборган.
Юқоридаги ҳолатлар бўйича Жиноят кодексининг 168-моддаси (фирибгарлик) жиноят ишлари қўзғатилиб, ҳозирги кунда дастлабки тергов ҳаракатлари олиб борилмоқда.
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.
Изоҳ (0)