“Толибон” ҳаракати Исроил кучларининг Ал-Ақсо масжидида фаластинликларга қилган ҳужумини кескин қоралади. Бу ҳақда Sputnik Аfg‘oniston хабар берди.
“Толибон” матбуот котиби Забиҳуллоҳ Мужоҳид масжиддаги ҳужумда Исроил хавфсизлик кучларини айблади. Афғонистон муваққат ҳукумати расмийси муқаддас жойларга ҳужумларни халқаро қонунларга зид деб баҳолади. У бу Исроил томонидан мусулмонлар қандай зулмга дучор бўлаётганини кўрсатишини қайд этди.
Шунингдек, “Толибон” ислом дунёси давлатларини фаластинликларни ҳимоя қилишда биргаликда ҳаракат қилишга чақирди.
5- ва 6 апрель кунлари Исроил кучлари Ал-Ақсо масжидидаги фаластинликларга ҳужум қилди. Полиция фаластинликларни тарқатишда электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.
Ливаннинг “Ҳизбуллоҳ” эронпараст қуролли ҳаракати Исроилга қарши мумкин бўлган “барча чораларни” қўллаб-қувватлаши ҳақида огоҳлантирган. Мазкур баёнот фонида Ливан ҳудудидан Исроилга ракеталар учирилган, Исроил ҳам бунга жавобан қарши авиаҳужумни амалга оширган.
АҚШ, Исроил, Ливан ва Ғазодан учирилган ракеталардан кейин ўзини ҳимоя қилиш ҳуқуқига эга эканини билдирган. Эрон президенти Иброҳим Раисий фаластинликларга қарши ҳужумни қоралаб, бунга қарши чора кўришга чақирган.
Иордания маъмурияти Исроилнинг провокациялари босиб олинган Шарқий Қуддусдаги Ал-Ақсо масжиди мажмуасини “жанг майдони”га айлантириши ҳақида огоҳлантирган.
Иордания Ташқи ишлар вазирлиги агар Исроил полицияси “намозхонларни масжиддан чиқариш учун бостириб киришга тайёргарлик кўриш мақсадида яна ҳужум қилса, бу вазиятни янада кескинлаштириб, зўравонликка олиб келишини” билдирди. Вазирлик бунинг учун ҳамма товон тўлашини қайд этди.
Изоҳ (0)