Шарқий Қуддусда 130 мингга яқин киши Ал-Ақсога жума намоз ўқишга келди. Бу ҳақда Мir 24 хабар берди.
Исроил полицияси мусулмонлар тўпланиб қолмаслиги учун намоздан олдин шаҳарга деярли барча кириш йўлларини тўсиб қўйган. Бундан ташқари, Фаластиннинг Ғарбий соҳилидан яҳудий давлати ҳудудига ўтадиган барча ўтиш жойлари тўсилган.
5- ва 6 апрель кунлари Исроил кучлари Ал-Ақсо масжидидаги фаластинликларга ҳужум қилган. Полиция фаластинликларни тарқатишда электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.
Ливаннинг “Ҳизбуллоҳ” эронпараст қуролли ҳаракати Исроилга қарши мумкин бўлган “барча чораларни” қўллаб-қувватлаши ҳақида огоҳлантирган. Мазкур баёнот фонида Ливан ҳудудидан Исроилга ракеталар учирилган, Исроил ҳам бунга жавобан қарши авиаҳужумни амалга оширган.
АҚШ Исроил Ливан ва Ғазодан учирилган ракеталардан кейин ўзини ҳимоя қилиш ҳуқуқига эга эканини билдирган. Эрон президенти Иброҳим Раисий фаластинликларга қарши ҳужумни қоралаб, бунга қарши чора кўришга чақирган.
“Биз Ислом ҳамкорлик ташкилотининг фавқулодда йиғилишини ўтказиш ва Фаластин халқини ҳимоя қилиш учун қўшма резолюция қабул қилишга чақирамиз”, — деди Раисий.
7 апрелга ўтар кечаси Исроил армияси Ғазо секторига зарба берган. ОАВ хабар беришича, Исроил Ғазо секторидаги ҲАMAS ҳаракатининг позицияларига ҳужум қилган. Камида 10 та портлаш содир бўлган. Қурбонлар ҳақида маълумот йўқ. Ғазодан Исроилга учирилган жавоб ракеталари эса “Темир гумбаз” ҳаво ҳужумидан мудофаа тизими ёрдамида қайтарилган.
Изоҳ (0)