Жанубий Корея тўрт кундан бери Кореялараро алоқа канали ва ҳарбий қайноқ линия орқали Шимолий Корея билан боғлана олмаяпти, деб хабар берди Yonhap ахборот агентлиги 10 апрель куни эрталаб.
Икки Кореяни бирлаштириш вазирлиги маълумотларига кўра, душанба куни эрталаб соат 9:00 да (Тошкент вақти билан 05:00) Шимол қўнғироқларига жавоб бермаган. Қайд этилишича, Жанубий Кореянинг қўнғироқлари 7 апрелдан бери жавобсиз қолмоқда.
Ўз навбатида, Жанубий Корея Мудофаа вазирлиги тўрт кундан бери ҳарбий қайноқ линия орқали ҳам Пхеньян билан алоқа йўқлигини маълум қилди.
Агентликнинг эслатишича, икки Корея кунига икки марта — 9:00 (Тошкент вақти билан 5:00) ва 17:00 (Тошкент вақти билан 13:00) да телефон орқали суҳбат ўтказар эди.
Шимолнинг айнан нима учун қўнғироқларга жавоб беришдан бош тортаётгани номаълум. Бироқ Пхеньян Сеул чақирувларини атайлаб жавобсиз қолдираётгани ва шу орқали Жанубий Корея ва АҚШнинг қўшма ҳарбий машғулотларига норозилик билдираётгани тахмин қилинмоқда.
2021 йил июль ойида КХДР ва Жанубий Корея ўртасида тўғридан тўғри алоқа линиялари тикланган эди. Алоқаларни Пхеньян 2020 йилда узган. Ўша йили июнь ойида КХДР расмийлари Сеул билан барча мавжуд алоқа каналлари орқали мулоқот тўхтатилганини эълон қилди. Сўнг қуролсизлантирилган зона яқинида жойлашган Кесон саноат паркидаги Кореялараро алоқа идораси портлатиб юборилди. Шимолий Корея расмийлари бино уларнинг қарори билан вайрон қилинганини тасдиқлади.
Изоҳ (0)