Twitter эгаси Илон Маск Россия собиқ президенти ва амалдаги Хавфсизлик кенгаши раиси ўринбосари Дмитрий Медведевнинг Украинанинг “йўқ бўлиб кетиши” ҳақидаги постини ўчиришдан бош тортди.
Маск Россия собиқ президентининг постини “геноцидга чақириқ” деб ҳисоблаган фойдаланувчилардан бирининг твитига шундай жавоб берган. “Барча янгиликлар у ёки бу даражада пропоганда. Одамларнинг ўзи қарор қилсин”, — дейди у.
Маскнинг айтишича, Россия президенти Владимир Путин уни Украинага ёрдам бергани учун “ҳарбий жиноятчи” деб атаган. “Шундай экан, у аниқ менинг яқин дўстим эмас”, — таъкидлади тадбиркор.
Яна бир твитида Маск Twitter Россия давлат идоралари аккаунтларини “на рағбатлантиради, на чеклайди” деб ёзган. “Аммо тизимдан алдаш учун фойдаланишга уринишларни тезда тўхтатамиз. Бошқалар шундай қилаётгани учун цензура қилиш — ожизлик. Уларнинг матбуоти эркин бўлмаганда, бизники эркин бўлишини таъминлаш — куч намойиши”, — деди ижтимоий тармоқ эгаси.
8 апрель куни Медведевнинг Twitter’даги инглизча аккаунтида Украинанинг “йўқ бўлиб кетиши” ҳақида пост қўйилди. Рус тилидаги шундай пост собиқ президентнинг “ВKонтакте” ижтимоий тармоғидаги саҳифасида эълон қилинган. Унда Медведев Украина “ҳеч кимга керак эмас” шунинг учун у “йўқ бўлиб кетади” деб ёзган. Унинг фикрича, Европа, АҚШ, Африка, Лотин Америкаси, Осиё, Россия ва Украина фуқароларининг ўзига ҳам Украинанинг кераги йўқ.
Апрель ойида журналистлар Twitter Россия давлат муассасалари аккаунтларидаги чекловни олиб ташлаганини пайқашди, улар қидирув сўровлари ва тавсияларнинг юқори қаторларидан чиқа бошлади. Хусусан, ижтимоий тармоқ Кремль ва Россия ТИВ аккаунтларини тавсия қилишни бошлаган.
Изоҳ (0)