АҚШ президенти Жо Байденнинг навбатдаги сайлов кампаниясини қўллаб-қувватлаш учун Оқ уй турли ижтимоий платформалардаги машҳур блогерларни жалб қилишни режалаштирмоқда — уларга Америка президенти қароргоҳидан алоҳида брифинг хонаси очилиши мумкин. Бу ҳақда Axios нашри хабар бермоқда.
Байденнинг рақамли жамоасидан тўрт нафар ходим аллақачон ушбу лойиҳа устида ишламоқда, дея аниқлик киритади нашр. Шу билан бирга, улар расмий равишда Демократик партия кампаниясида эмас, балки Оқ уйда ишлайди. Демократлар олдига қўйилган асосий вазифа — Демократик партиянинг сайловдаги муваффақияти учун муҳим бўлиши кутилаётган ёш сайловчиларни жалб қилиш ва собиқ президент Дональд Трамп 2024 йилда Республикачилар партиясидан номзодини қўядиган бўлса, унинг ижтимоий тармоқлардаги миллионлаб издошларига қарши туришдир.
Байденнинг рақамли стратегия жамоаси ижтимоий тармоқларда на Оқ уй, на Демократик партияга эргашадиган ёки асосий оммавий ахборот воситаларидан умуман “узилган” америкаликларни нишонга олиш учун бутун мамлакат бўйлаб машҳур одамлар билан алоқа ўрнатмоқчи.
“Биз ёшлар, шунингдек, маълумот олиш учун турли платформалардан фойдаланадиган оналар, иқлим фаоллари ва асосан рақамли платформалардан ахборот оладиган бошқа одамлар билан боғланишга ҳаракат қилмоқдамиз”, — деди Оқ уй аппарати раҳбари ўринбосари Жен O’Maлли Диллон.
Байден иккинчи муддатга номзодини қўйиш қарорини ҳали расман эълон қилгани йўқ. 2023 йил февралида у 2024 йилги президентлик сайловларида иштирок этиш ниятини тасдиқлаганди, бироқ ҳали якуний қарорга келмаган.
Журналистлар билан суҳбатда Байден ёши ва соғлиғи унга қайта сайланишга тўсқинлик қилмаслиги ва президентлик вазифаларини бажаришга халақит бермаслигини айтганди. 2024 йилги АҚШ президентлик сайлови вақтида президент Байден 82 ёшга тўлади.
The Wall Street Journal нашрининг ёзишича, Байденнинг маслаҳатчилари аллақачон унинг сайловолди кампаниясига тайёргарликни муҳокама қила бошлаган. Жамоа ҳозир кўриб чиқаётган мавзулар — кампания штабининг тузилиши, унинг асосий ходимлари, шунингдек, бўлажак штабнинг жойлашуви масалаларидан иборат.
Изоҳ (0)