Россиянинг “Летуал” косметика компанияси Ўзбекистонда фаолиятини бошлайди

Россиянинг “Летуал” парфюмерия-косметика тармоғи Ўзбекистон бозорига кириш имкониятларини кўриб чиқмоқда. Бу ҳақда “Коммерсант” хабар бермоқда.

Компания Ўзбекистондан ташқари Қозоғистон, Арманистон, Беларусь, Қирғизистон, Тожикистон ва Мўғулистонга кириб келмоқчи.  

Таъкидланишича, 2023 йил февраль ойида HeadHunter порталидаги “Летуал” профилида бир нечта вакансиялар пайдо бўлган. 

Масалан, компания дўконлар очилишида иштирок этадиган Олмаота шаҳридаги хавфсизлик бўйича директор қидирмоқда. МДҲ мамлакатлари бўйича бош ҳисобчи лавозимига ҳам вакансия эълон қилинган. 

Вакансия таърифларида, иш фаолияти бир неча ой ичида бошланиши айтилган. Айни пайтда юридик шахслар, ҳисоб-китоб ҳисобварақларини очиш учун тайёргарлик ишлари олиб борилмоқда. 

“Коммерсант”нинг косметика бозоридаги манбаси ҳам “Летуал”нинг чакана савдо тармоғини, хусусан, Ўзбекистон ва Қозоғистонда ривожлантириш режалари ҳақида гапирди.

Унинг сўзларига кўра, Ўзбекистондаги талабни кўплаб ёш истеъмолчилар, шунингдек, мамлакатга кўчиб келган россияликлар ҳам таъминлаши мумкин. 

Қозоғистонда эса парфюмерия ва косметика бозорида “Летуал” билан бир сегментда ишлайдиган асосий ўйинчилар йўқ. 

ЛъЭтоиле— 1997 йилда Максим Климов томонидан асос солинган Россиядаги энг йирик парфюмерия чакана савдо тармоғи. Ҳозир компания мамлакатнинг 250 та шаҳрида мингга яқин дўконларга эга. 

Россиянинг бошқа йирик косметик тармоқлари ҳам ташқи бозорларга чиқмоқда. Роппа-роса бир йил аввал Магнит Cosmetics ҳам Ўзбекистонда дўконларини очганди. Ҳозирда компания дўконлари 12 тага етган. 

Infoline-Analytics бош директори Михаил Бурмистров Ўзбекистон, Қозоғистон, Грузия, Арманистон, Қирғизистон пойтахтларидаги ўйинчиларнинг ривожланиши ушбу мамлакатларда иқтисодиёт ва истеъмол бозори ўсиб бораётгани, шунингдек, мамлакатдан эмиграция тўлқинининг таъсири туфайли истиқболли деб ҳисобламоқда.