Қирғизистон Ўзбекистонга сут ва гўшт экспорт қилишни режалаштирмоқда

Қирғизистон Ўзбекистонга экспорт учун сут ва гўшт маҳсулотларини етказиб беради. Бу ҳақда Қирғизистон Қишлоқ хўжалиги вазирининг биринчи ўринбосари Нурдин Алишеровга таяниб, “Economist.kg” хабар бермоқда. 

Алишеровнинг сўзларига кўра, департамент Ўзбекистон ҳукумати билан “йўл харитаси”ни аллақачон имзолаган ва ҳозир Қирғизистон Республикасидан сут ва гўшт маҳсулотларини экспорт қилиш учун чегараларни очиш бўйича музокаралар олиб борилмоқда.

“Ҳозир Қишлоқ хўжалиги вазирлиги фермерларга зотли чорва молларини кўпайтиришга йўналтирмоқда. Кунига беш литр сут берадиган тўртта сигир боқишдан кўра, қирқ литр сут берадиган битта зотли сигир боқилгани маъқул”, — деди вазир ўринбосари.

Алишеров чорвачилик йўналиши Қирғизистон учун айниқса истиқболли эканини, доимий ўсиш суръатлари кузатилаётганини таъкидлади. 

Ўзбекистон Қирғизистон учун 35 миллион аҳолига эга янги ва муҳим бозор ҳисобланади.

Декабрь ойи охирида Ўзбекистон Мўғулистондан гўшт импортини ошириши маълум бўлганди.