АҚШда 2 америкалик санкцияларни четлаб ўтган ҳолда Россияга авиатехнологиялар юборишда айбланиб ҳибсга олинди
Канзас штатида икки америкалик фуқаро АҚШ экспорт назоратини четлаб ўтган ҳолда, Россияга авиация технологияларини юборишда айбланиб ҳибсга олинди.
АҚШ Адлия вазирлиги баёнотига кўра, 59 ёшли Сайрил Грегори Баяновский ва 55 ёшли Дуглас Робертсон 2020 йилдан бери АҚШ экспорт қонунларини четлаб ўтиш учун тил бириктириб келган.
Гумонланувчилар “КанРус” фирмасини бошқарган. Фирма Россия компанияларини Ғарб авиацияси ускуналари билан таъминлаган ва Россияда ишлаб чиқарилган самолётлар жиҳозларини таъмирлаб келган, дейди расмийлар.
Хусусан, 2020—2021 йилларда Баяновский ва Робертсон фирмаси Россия компаниясидан авионика(авиация ва электроника)ларни таъмирлаш учун буюртма олган, улар орасида Россия Федерал хавфсизлик хизматининг белгиси бор ускуналар ҳам бўлган. 2022 йилнинг майидан июлигача компания авиация ускуналарини Россияга тегишли лицензиясиз учинчи давлатлар орқали етказиб берган.
Баяновский ва Робертсонга бир нечта моддалар, жумладан, фитна уюштириш, чекланган товарларни лицензиясиз экспорт қилиш, қалбакилаштириш ва контрабанда бўйича айбланмоқда. Агар айбдор деб топилса, улар биргина ноқонуний экспорт билан боғлиқ моддалар бўйича 20 йилгача қамоқ жазосига ҳукм қилинади.
АҚШ Россиянинг Украинага бостириб киришидан кейин Россияга авиатехнологияларни етказиб беришга чекловлар киритди. Санкциялар Россиянинг мудофаа, аэрокосмик ва иқтисодиётнинг денгиз секторлари учун мўлжалланган бошқа товарларни етказиб беришга чекловларни ҳам ўз ичига олади.
