Чехия Австрияга Украинадаги урушни тугатишда воситачилик қилишни таклиф қилди
Австрия ўзининг бетарафлик мақомидан фойдаланиб Украинадаги урушни ҳал қилишда воситачилик қилиши мумкин, деди Чехиянинг амалдаги президенти Милош Земан австриялик ҳамкасби Александр ван дер Беллен билан учрашувда.
“Бу бизни бефарқ қолдира олмайди. Австрия ҳарбий жиҳатдан нейтрал, аммо бетарафлик бефарқлик дегани эмас”, — деб жавоб қайтарган ван дер Беллен Земаннинг таклифига.
Маълумот ўрнида Земан 2013 йилдан буён ўн йил давомида Чехия президенти бўлиб келган. 2023 йилнинг январь ойида республикада янги президентлик сайловлари бўлиб ўтди, унда НАТОнинг истеъфодаги генерали Пётр Павел ғалаба қозонди. У келаси ҳафта, 9 март куни расман Чехия раҳбари лавозимига киришади.
Ван дер Беллен 2022 йил охирида янги олти йиллик муддатга қайта сайланганди.
Ўтган йили Австрия канцлери Карл Нехаммер Россия президенти Владимир Путин билан икки марта, апрелда шахсан ва май ойида телефон орқали гаплашган. У уруш бошланганидан кейин Путин билан учрашган биринчи Европа етакчисига айланди. Нехаммер учрашувдан олдин ҳам Австрия Украинадаги можаро бўйича нейтрал позицияни эгаллашини айтган, учрашувдан кейин эса мулоқот “умуман ижобий таассурот қолдирмагани”ни маълум қилган.
Шу билан бирга, Австрия канцлери декабрь ойида, агар бу можарони тинч йўл билан ҳал қилишга ижобий таъсир кўрсаца, Путин билан алоқани давом эттиришга тайёрлигини таъкидлаган эди. “Биз бетараф давлатмиз, Европа Иттифоқида алоҳида мақомга эгамиз ва айнан шу сабабдан музокараларда воситачилик ролини ўйнашга ҳаракат қилиш мен учун муҳим”, — дея тушунтирган у.
