Россия Коммунистик партиясидан Самара вилоят думаси депутати Михаил Абдалкин президент Владимир Путиннинг Федерал Мажлисга мурожаатини қулоғига лағмон илган ҳолда томоша қилганди. Мазкур ҳолат юзасидан депутат Россия Қуролли кучларини обрўсизлантиришда айбланди. Бу ҳақда “Газета.ру” хабар берди.
Депутатга нисбатан Россия Қуролли кучларини обрўсизлантириш (Маъмурий жавобгарлик тўғрисидаги кодексининг 20.3.3-моддаси 1-қисми) бўйича маъмурий баённома тузилди. Материаллар Новокуйбишевск шаҳар судига юборилган. Баённома 7 март куни кўриб чиқилади.
21 февраль куни Россия президенти Владимир Путин Федерал Мажлисга мурожаат билан чиқди. Шу куни Абдалкин ўзининг “VKонтакте” ижтимоий тармоғидаги саҳифасида қулоғига лағмон илиб, президент мурожаатини томоша қилаётган видеоси билан пост жойлаштирди. Кейинроқ давлат думаси депутати Александр Хинштейн Абдалкиннинг қилмишидан норози бўлиб, уни “ўзини тийиб туришга” чақирди.
Ўз навбатида, Коммунистик партия фракцияси матбуот хизмати раҳбари Александр Юшченко берган интервьюсида депутатнинг қилмишини “аҳмоқлик” деб атади ва уни “касбий фаолияти”га баҳо беришга ундади.