Греция тарихидаги энг йирик темирйўл ҳалокати қурбонлари сони 57 кишига етди, бироқ бу рақамлар ҳали ошиши мумкин, деб хабар бермоқда Euronews.
Лариса шаҳри чеккасида юк поезди билан тўқнашиб кетган Афина—Салоники йўловчи поезди йўловчиларининг аксарият қариндошлари ҳалигача яқинларининг тақдири қандай кечганини билолмаяпти.
Қутқарувчилар пачоқланиб кетган металл орасидан одамларни қидиришни давом эттирмоқда. Ўт ўчирувчиларнинг сўзларига кўра, поезднинг ресторан-вагони тўқнашувдан сўнг дарҳол ёниб кетган, ундаги ҳарорат 1300 даражага етган бўлиши мумкин.
Фожиа грек жамиятини ҳайратда қолдирди. Қон қуйиш пунктларида донор бўлишни хоҳловчиларнинг узун навбатлари пайдо бўлди. Мамлакатда норозилик намойишлари бўлиб ўтмоқда, темирйўлчилар иш ташламоқда, улар ҳаракат хавфсизлигини таъминлаш билан боғлиқ “сурункали” муаммолар ҳақида гапиришмоқда.
Истеъфога чиққанини эълон қилган собиқ транспорт вазири Костас Караманлис “ҳукумат содир бўлган воқеаларнинг олдини олиш учун етарлича ҳаракат қилмаганини” тан олди.
59 ёшли вокзал бошлиғи 1 март куни ҳибсга олинган ва унга “эҳтиётсизликдан одам ўлдириш” ва “танага шикаст етказиш” айбловлари қўйилган. Вокзал раҳбари ўзининг “хатоси” туфайли йўловчи ва юк поездлари бир релсда ҳаракатланганини қисман тан олди. Шу билан бирга, Reuters айбланувчи адвокатининг фожиага нафақат “бепарволик”, балки “бошқа омиллар” ҳам сабаб бўлгани ҳақидаги сўзларини келтирди.
1 мартга ўтар кечаси Грециянинг Евангелизмос станциясида икки поезд тўқнашиб, йўловчи поездининг учта вагони релсдан чиқиб кетганди, шундан сўнг ёнғин бошланган. Ҳодисага икки поезднинг бир вақтда битта релсда йўлга чиққани сабаб бўлган.