“ОКМК” стадионини ёритиш учун 420 минг евролик прожекторлар, бир манзилда, бир маҳаллада жойлашган рақобатчилар: 2 март тендерлари тафсилоти

2 март куни Ўзбекистон Республикаси товар-хом ашё биржасида 100 дан ортиқ тендерлар якунланди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.

Стадион прожекторлари учун 420 минг евро

Олмалиқ кон-металлургия комбинати 16—23 февраль саналари оралиғида бошланғич нархи 494 минг 780 евро бўлган тендер ўтказди. Буюртмачига футбол майдони учун икки турдаги жами 236 та ёритиш прожектори етказиб бериш талаби қўйилган.

Лот (тартиб рақами: 230588) маълумотларига кўра, бир донасининг нархи 605 евро бўлган прожекторлардан 16 та, 2205 евро бўлган прожекторлардан 220 та олиб келинади.

Тендерни ютиб олиш учун 6 та тадбиркорлик субъекти рақобатлашди. Якунда комиссия аъзоларининг баҳоларига кўра, Россиянинг “Торговий Дом Уралъский Завод Ҳимическ” корхонаси тендер ғолиби бўлди. Шартнома суммаси — 420 минг 864 евро.

Маҳалладошлар рақобати

2 март куни Сурхондарё вилояти Бойсун тумани Аёллар дафтари жамғармаси ўтказган тендер якунланди. Бошланғич нархи 214 миллион 460 минг сўм бўлган тендердан кам таъминланган аёлларга уй-жой таъмирлаш учун қурилиш моллари харид қилиш кўзда тутилган.

Ғолиблик учун “Покиза” хусусий фирмаси ва ”Бойсун Идеал Саноат” хусусий корхонаси рақобатлашди. Якунда 100 балл тўплаган “Покиза” тендер ғолиби, 95 балли “Бойсун Идеал Саноат” эса захирадаги ғолиб деб топилди.

Очиқ маълумотлар орқали тендер иштирокчиларининг раҳбарияти билан қизиққанимизда, иккала корхонанинг ҳам жойлашув манзиллари Сурхондарё вилояти Бойсун тумани Бойсун шаҳри “Оби” маҳалласи Ибрат кўчасида экани маълум бўлди.

Аммо таъсисчи ва раҳбарлар, шунингдек, бошқа кўрсаткичларда боғлиқлик аниқланмади.

Бир манзилдаги корхоналар иштироки

“Ўзметкомбинат” акциядорлик жамияти экологик лойиҳа дастурини ишлаб чиқиш учун бошланғич қиймати 24 миллион 500 минг сўм бўлган тендерни якунлади. 227348-лот маълумотига кўра, ғолибга 15 фоизлик аванс тақдим этилади.

Тендер ғолиблиги учун 4 та корхона курашган бўлса, улардан бири (Green Time МЧЖ) номаълум сабабга кўра дисквалификация қилинган. Комиссия аъзоларининг якуний баҳоларига кўра, Clean Version МЧЖ 100 балл билан ғолиб, Ekо Weather Standart МЧЖ 60 балл билан захира ғолиб деб топилган. Эcо-Projects-Group эса 52 балл билан тендерни ютқазган.

Статистика агентлиги маълумотларига кўра, Clean Version корхонаси Тошкент шаҳри Чилонзор тумани Бунёдкор шоҳкўчаси “Катта навбаҳор” маҳалласи 42-уйда жойлашган.

Шубҳалиси, тендерда иккинчи ўринда қайд этилган Ekо Weather Standart’нинг манзили ҳам айнан шу жой — Бунёдкор шоҳкўчаси “Катта навбаҳор” маҳалласи 42-уй деб кўрсатилган.

Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.