Давлат хавфсизлик хизмати республиканинг қатор вилоятларида жами 56 килограмм опий ва гашиш гиёҳвандлик воситаларини мусодара қилди.
Маълум қилинишича, ДХХ Чегара қўшинлари ва Сирдарё вилояти бўйича бошқармаси ҳарбий хизматчилари ҳамкорлигида ўтказилган тезкор-қидирув тадбирлари натижасида Тожикистондан Ўзбекистонга контрабанда йўли билан ўтказилган 4,8 килограмм опий ҳамда 42,89 килограмм гашиш моддалари тўхтатиб қолинган.
Тезкор суриштирув ҳаракатлари давомида аниқланишича, Марғилон шаҳрида яшовчи, муқаддам гиёҳвандлик воситалари савдоси билан боғлиқ жинояти учун судланиб, жазо муддатини ўтаган 37 ёшли шахс Тошлоқ туманида истиқомат қилувчи, 1987 йилда туғилган таниши билан бирга Бешариқ туманидаги чегара назорат ўтказиш пункти орқали Тожикистоннинг Сўғд вилояти Зафаробод туманига борган.
У ерда маҳаллий наркосавдогар билан учрашиб, гиёҳвандлик моддаларини 10 минг доллар эвазига Сирдарё вилоятининг Ховос тумани ҳудудига ўтказиб беришга келишган. Лекин курерлар наркотик моддаларни давлат чегарасидан ўтказган вақтида қўлга олинган.
Шунингдек, яшаш хонадонида 7,33 килограмм опий моддасини келгусида сотиш мақсадида сақлаб келган, Ургут туманида истиқомат қилувчи 31 ёшли фуқарога нисбатан ДХХ Самарқанд вилояти бўйича бошқармаси томонидан жиноят иши қўзғатилган. Ушбу иш доирасида унинг кўрсатмаси асосида қариндошининг уйидан 6 килограмм 403 грамм опий моддаси қўшимча ашёвий далил сифатида олинган. Мазкур наркотик моддалар ҳам Тожикистондан олиб келинган.
ДХХ Тошкент вилояти бўйича бошқармаси ходимлари томонидан вилоят божхона бошқармаси билан ҳамкорликда Юқори Чирчиқ туманида ҳам тезкор тадбир ўтказилган. Тадбирда Андижон вилоятининг Балиқчи туманида яшовчи, 1963 ва 1968 йилларда туғилган, муқаддам гиёҳвандлик воситалари савдоси билан боғлиқ жиноятлари учун судланиб, жазо муддатини ўтаган 2 нафар фуқаро 1 килограмм 399 грамм гашиш моддасини 15 минг долларга сотаётган вақтларида ушланган. Бу ҳолатда наркотик модда Қирғизистондан олиб келинган.
ДХХ Андижон вилояти бўйича бошқармаси ҳамда вилоят ИИБ ходимлари ҳамкорлигида ўтказилган тезкор тадбирда эса Андижон шаҳрида яшовчи, муқаддам судланган 44, 39, 36 ёшли уч нафар шахс қўлга олинган. Уларнинг ёнлари ва хонадонлари кўздан кечирилганда Қирғизистондан келтирилган жами 546 грамм гашиш моддаси борлиги аниқланиб, процессуал тартибда расмийлаштириб олинган.
Ҳозирда барча ҳолатлар юзасидан ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ ДХХ Бухорода гиёҳванд моддани 2,5 минг долларга сотишга уринган Афғонистон фуқаросини ушлагани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши қўлга олингани, ДХХ Наманган, Тошкент ва Сирдарёда гиёҳвандлик моддалари савдосига чек қўйгани тўғрисида хабар берилганди.
Изоҳ (0)