ДХХ Самарқанд, Жиззах ва Тошкент вилоятларида 11,4 кг опий ва гашиш моддалари савдосига чек қўйди (видео)

Самарқанд, Жиззах, Тошкент вилоятларида жами 11,4 килограмм опий ва гашиш моддалари мусодара қилинди, деб хабар бермоқда Давлат хавфсизлик хизмати.

Қайд этилишича, ДХХнинг Самарқанд вилояти бўйича бошқармаси ходимлари томонидан вилоят божхона бошқармаси билан ҳамкорликда тезкор тадбир ўтказилган. Унда Жиззах вилоятининг Бахмал туманида яшовчи фуқаро (1983 йилда туғилган) Ургут туманига бориб, танишидан (1992 йилда туғилган) 1 килограмм 916 грамм опий моддасини олгани аниқланган. Сўнг ўзининг бошқарувида бўлган Nexia-2 автомашинасида доимий яшаш манзилига қайтиб кетаётган вақтида Булунғур туманида ушланган ҳамда ундан гиёҳвандлик воситаси тегишли тартибда расмийлаштириб олинган.

Шунингдек, тезкор тадбир давом эттирилиб, унга ажал оғусини берган фуқаронинг Ургут туманидаги яшаш хонадони кўздан кечирилган. Натижада келгусида сотиш мақсадида сақланаётган 7 килограмм 331 грамм опий моддаси борлиги аниқланиб, у ҳам процессуал тартибда расмийлаштирилган.

Бундан ташқари, ДХХ Навоий ва Жиззах вилоятлари бўйича бошқармалари ходимлари томонидан божхона ҳамда ички ишлар органлари билан ҳамкорликда Ғаллаорол туманида ҳам тезкор тадбир ўтказилган. Унда эса Самарқанд вилоятининг Ургут туманида яшовчи фуқаро (1988 йилда туғилган) 469 грамм опий моддасини 8 минг долларга сотаётган вақтида ушланган.

Таъкидланишича, мазкур шахс муқаддам гиёҳванд моддалар савдоси билан боғлиқ жинояти учун судланиб, жазо муддатини ўтаган бўлса-да, ўз хатосидан тўғри хулоса чиқармаган.

Тезкор суриштирув ҳаракатлари давомида у моддани Ургут туманида яшовчи фуқародан (1989 йилда туғилган) 5 минг долларга сотиб олгани аниқланиб, у ҳам қўлга олинган.

Тошкент вилоятида кузатилган ҳолатда Наманган шаҳрида яшовчи аёл (1982 йилда туғилган) Бекобод шаҳрида ҳозирда шахсига аниқлик киритилаётган фуқародан 1 килограмм 696 грамм гашиш моддасини Наманган вилоятига етказиб бериш учун олиб, Оҳангарон шаҳрида Фарғона водийсига қатнайдиган автомашиналар тураргоҳига бораётган вақтида ДХХ Тошкент вилояти бўйича бошқармаси ҳамда вилоят божхона бошқармаси ходимлари томонидан ушланган.

Аниқланишича, наркотик моддани Наманган вилоятининг Pop туманига олиб бориб, керакли жойда қолдириб кетиши учун аёлга 200 доллар берилган.

Юқоридаги барча ҳолатда гиёҳвандлик воситалари мамлакатга Тожикистондан контрабанда йўли билан олиб келинган.

Ҳолат юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.