Ҳуқуқ-тартибот идоралари томонидан Автомобиль йўллари қўмитаси таркибидаги “Ўзавтойўлбелги” давлат унитар корхонаси фаолиятида ноқонуний ҳолатлар аниқланди, деб хабар беради ЎзА.
“Йўл ҳаракати хавфсизлигини таъминлаш тизимини янада такомиллаштириш чора-тадбирлари тўғрисида”ги қарорга мувофиқ, “Ўзавтойўлбелги”га истисно тариқасида маҳаллий ва хорижий ташкилотлар билан энг яхши таклиф орқали маҳсулотларни сотиб олиш тўғрисидаги шартномаларни танлов савдоларини ўтказмасдан тузишга рухсат берилган.
Аммо ДУК мансабдор шахслари 2021—2022 йилларда ўзларига таниш бўлган 5 та маҳаллий МЧЖ билан жами 9 миллиард 193 миллион сўмлик 21 та шартнома тузиб, улардан йўл белгиларини ясаш ва чизишда фойдаланиладиган маҳсулотларни эркин бозор нархларидан қиммат нархларда харид қилиб, 2 миллиард 701 миллион сўм миқдоридаги бюджет маблағларини талон-торож қилган.
Ҳолат юзасидан “Ўзавтойўлбелги” ДУК ва 5 та МЧЖ мансабдор шахсларига нисбатан жиноят иши қўзғатилган.
Аввалроқ Сурхондарёда 11 млрд сўмдан зиёд кредит маблағлари ноқонуний ўзлаштирилгани аниқлангани, “Ўзсувтаъминот”да 2022 йил қарийб 46 млрд сўмлик хато ва камчиликларга йўл қўйилгани, Қашқадарёда банк мансабдорлари қарийб 4 млрд сўмни ўзлаштирганликда гумонланаётгани тўғрисида хабар берилганди.
Изоҳ (0)