БАА Марказий Осиё давлатлари фуқаролари учун тиббий туризм хизматларини кўрсатиш мақсадида Тошкент шаҳрида ваколатхона очмоқчи.
Хабарга кўра, мамлакатнинг Бирлашган Араб Амирликларидаги элчихонаси вакиллари Burjeyel holdings компанияси таклифига биноан, Абу-Даби шаҳридаги Burjeyel medical city мажмуасида бўлиб, икки томонлама музокаралар олиб борди. Мажмуадаги замонавий тиббий асбоб-ускуналар билан жиҳозланган онкология, педиатрия, физиотерапия ва бошқа бўлимларга уюштирилган таништирувдан сўнг, холдингнинг бош корпоратив директори Ҳамад Аҳмад Ал Хосаний компаниянинг келгусидаги режалари ва Марказий Осиё бозорига киришга бўлган интилишлари ҳақидаги фикрлари билан ўртоқлашди.
Жумладан, БАА томони амалда фаолият юритаётган хусусий шифохоналар бошқарувига шериклик асосида кириш орқали мавжуд қувватларни ошириш, замонавий тиббий жиҳозлар билан таъминлаш, холдингнинг бошқарув тизимини ва рақамлаштириш тизимларини жорий қилиш ҳамда холдинг шифохоналарида маҳаллий ходимлар малакасини ошириш юзасидан манфаатдорлик билдирилди. Шунингдек, ўз бизнес имкониятларини кенгайтириш, холдинг фаолиятини минтақада тарғиб қилиш ҳамда Марказий Осиё давлатлари фуқаролари учун тиббий туризм хизматларини кўрсатиш мақсадида Тошкент шаҳрида ваколатхона очиш бўйича амалий кўмак кўрсатиш сўралди.
Учрашув сўнгида 2023 йил март—апрель ойларида БААдан ишчи гуруҳнинг Ўзбекистонга амалий сафарини уюштириш, шу тариқа тиббиёт соҳасидаги ўзгаришлар ва эҳтиёжларни ўрганиш ҳамда истиқболли лойиҳалар билан жойида танишиш юзасидан келишувга эришилди.
Изоҳ (0)