“Ипакчилик тармоғини янада ривожлантириш бўйича чора-тадбирлар тўғрисида”ги президент қарори қабул қилинди.
Мазкур қарор юқори сифатли ипак маҳсулотлари ишлаб чиқаришни рағбатлантириш, республика ипакчилик тармоғи корхоналарининг барқарор фаолият юритишини ҳамда ипакчилик тармоғини комплекс ривожлантиришни таъминлаш мақсадида қабул қилинган.
Ҳужжат билан Ички ишлар вазирлиги “Ўзбекипаксаноат” уюшмаси билан биргаликда 2023 йил баҳорги пилла етиштириш мавсумидан бошлаб тажриба тариқасида пиллачилик кластерлари ҳамда Тошкент вилояти Бўка ва Оҳангарон туманларида жойлашган манзил-колония типидаги жазони ижро этиш муассасалари ўртасида пилла хом ашёсини етиштириш юзасидан шартномалар тузиш амалиётини йўлга қўяди.
Шунингдек, қарор билан 2023 йил 1 мартдан 2026 йил 1 январгача пиллани қайта ишлаш ва пилла қурти уруғини ишлаб чиқарувчиларга улар томонидан бевосита пилла боқувчиларга етказиб берилган ҳар қути ипак қурти уруғи учун 120 минг сўм миқдорида субсидия ажратиш белгиланган.
Эслатиб ўтамиз, 2022 йил майда президент қарори билан ипакчилик ва қоракўлчилик соҳасига тақдим этилган айрим солиқ имтиёзлари муддатларини узайтириш белгиланганди. Ҳужжат билан қоракўлчилик маҳсулотлари ишлаб чиқарувчилари учун ер солиғи ставкасини 2018 йилда белгиланган миқдорда сақлаб қолиш муддати 2026 йилгача узайтирилган эди.
Изоҳ (0)