Тошкентда жуда кўп миқдорда пулларни ўзлаштирган МЧЖ мансабдорларига нисбатан жиноят иши қўзғатилди, деб хабар бермоқда пойтахт ИИББ матбуот хизмати.
Маълум қилинишича, Э.Э. (1991 йилда туғилган) ва З.Г. (1988 йилда туғилган) 2022 йил 10 январь куни «Райёна Қутлуғ» номли масъулияти чекланган жамиятни ташкил қилиб, 1 августгача фаолият олиб борган.
Улар шу даврда фуқароларга автомашина ҳамда уй-жойларни бошланғич тўловни 10 фоиздан 50 фоизгача миқдорда тўлаб, қолган пулларни 40 иш кунидан 3 йилгача бўлган муддатда бўлиб тўлаш имконини берувчи шартлар асосида олиб бериши мумкинлигини билдирган.
Мижозларни ишонтириш мақсадида улар билан шартнома тузган. Бироқ МЧЖ мансабдор шахслари фуқаролар томонидан бошланғич тўлов сифатида тўланган пулларни, яъни дастлабки маълумотга кўра 2 миллиард сўмдан ортиқ миқдордаги пулларни ноқонуний равишда ўзлаштирган.
Мазкур ҳолат юзасидан Миробод тумани ИИО ФМБ ҳузуридаги Тергов бўлими томонидан Жиноят кодекси 167-моддаси («ўзлаштириш ёки растрата йўли билан талон-тарож қилиш») аломатлари билан жиноят иши қўзғатилган. Тергов ҳаракатлари олиб борилмоқда.
Изоҳ (0)