Ўзбекистон Транспорт вазирлиги Беларусь орқали Польшага юк ташувчиларга мурожаат билан чиқди

Ўзбекистон Транспорт вазирлиги Беларусь орқали Польшага автотранспортда халқаро юк ташиш фаолияти билан шуғулланувчиларни огоҳлантирди.

Қайд этилишича, Польша Ички ишлар вазирлигининг тегишли қарори билан 21 февралдан Беларусь билан “Кукурики—Козловичи” чегара назорат ўтказиш пункти орқали (Европа Иттифоқига ва Европа эркин савдо ассоциациясига аъзо мамлакатларда рўйхатга олинган юк автотранспорт воситаларидан ташқари) барча юк авто транспорт воситалари ҳаракатланиши икки томонлама (кириш-чиқиш) вақтинча номаълум муддатга тўхтатилган.

Буниниг натижасида ҳозирда ушбу чегара назорат ўтказиш пунктида хорижий мамлакатлар юк ташувчиларининг транспорт воситалари тўпланиб қолган.

“Шу муносабат билан миллий ташувчилардан Европа мамлакатларига юк ташувларини амалга ошириш жараёнида ушбу ҳолатни инобатга олишларини сўраб қоламиз”, — дейилади хабарда.

Таъкидланишича, ҳозирда ўзбек миллий ташувчилари юк транспорт воситаларининг Литва чегара назорат ўтказиш пунктлари орқали тўсиқларсиз ҳаракатланишини таъминлаш юзасидан музокаралар олиб борилмоқда.

Европа давлатларига юк ташувларини амалга ошираётган миллий ташувчиларда ушбу вазият юзасидан саволлар туғилганда қуйидаги телефон рақамларига қўнғироқ қилишлари мумкин: +998 (71) 202-05-01 (114) +998 (97) 709-16-00.