Huquq-tartibot idoralari tomonidan Avtomobil yo‘llari qo‘mitasi tarkibidagi “O‘zavtoyo‘lbelgi” davlat unitar korxonasi faoliyatida noqonuniy holatlar aniqlandi, deb xabar beradi O‘zA.
“Yo‘l harakati xavfsizligini taʼminlash tizimini yanada takomillashtirish chora-tadbirlari to‘g‘risida”gi qarorga muvofiq, “O‘zavtoyo‘lbelgi”ga istisno tariqasida mahalliy va xorijiy tashkilotlar bilan eng yaxshi taklif orqali mahsulotlarni sotib olish to‘g‘risidagi shartnomalarni tanlov savdolarini o‘tkazmasdan tuzishga ruxsat berilgan.
Ammo DUK mansabdor shaxslari 2021—2022-yillarda o‘zlariga tanish bo‘lgan 5 ta mahalliy MCHJ bilan jami 9 milliard 193 million so‘mlik 21 ta shartnoma tuzib, ulardan yo‘l belgilarini yasash va chizishda foydalaniladigan mahsulotlarni erkin bozor narxlaridan qimmat narxlarda xarid qilib, 2 milliard 701 million so‘m miqdoridagi budjet mablag‘larini talon-toroj qilgan.
Holat yuzasidan “O‘zavtoyo‘lbelgi” DUK va 5 ta MCHJ mansabdor shaxslariga nisbatan jinoyat ishi qo‘zg‘atilgan.
Avvalroq Surxondaryoda 11 mlrd so‘mdan ziyod kredit mablag‘lari noqonuniy o‘zlashtirilgani aniqlangani, “O‘zsuvta’minot”da 2022-yil qariyb 46 mlrd so‘mlik xato va kamchiliklarga yo‘l qo‘yilgani, Qashqadaryoda bank mansabdorlari qariyb 4 mlrd so‘mni o‘zlashtirganlikda gumonlanayotgani to‘g‘risida xabar berilgandi.
Izoh (0)