Ушбу нохуш муаммони махсус ёки қўлбола воситалар билан осонгина ҳал қилса бўлади.
Нима учун кўзойнаклар терлайди?
Бунинг сабаби ҳарорат кескин пасайиб кўтарилишидир. Қишда ташқарида юрганда линзаларнинг юзаси совийди ва иссиқ хонага кирганингизда, ҳаводаги намлик уларга майда томчилар — конденсат шаклида жойлашади. Агар совуқда илиқ ҳаво линзаларга урилса ёки қайноқ сув солинган идишга бошингизни эгсангиз, худди шундай бўлади.
Кўзойнакни конденсациядан қандай ҳимоя қилиш керак?
Энг ишончли усул — гидрофобик қопламали линзалар ўрнатиш. У ойна сиртини силлиқ қилади ва сув томчилари унинг устида туриб қолмайди. Бундай линзалар оддийларига қараганда қимматроқ, лекин уларни қайта ишлашга ва артишга ҳожат бўлмайди.
Агар кўзойнакни алмаштиришни режа қилмаётган бўлсангиз, кўзойнакни конденсациядан ўзингиз мана шундай усулда ҳимоя қилиб кўринг.
Maxсус воситалар
Оптик дўконларда таркибида гидрофобик бирикмалар бўлган спрейлар ёки ушбу модда сингдирилган кўзойнак салфеткалари шаклида топиш мумкин. Ушбу воситалар антифоглар деб ҳам аталади. Улар сиртда намликни қайтарадиган юпқа кўринмас плёнка ҳосил қилади. Уйдан чиқишдан олдин, кўзойнакни чангдан тозалаб артиб, антифогдан линзаларга тенг равишда тақсимлаб пуркашингиз ва яхшилаб қуришини кутишингиз керак. Бу жараённи ҳар сафар кўчага чиқишдан аввал бажариш талаб этилади.
Ушбу ечим ҳар қандай кўзойнак учун ишлайди: қуёш нуридан ҳимоя қиладиган, узоқ ва яқинни кўришга, сузишга ва бошқа спорт турларига мўлжалланган кўзойнаклар учун ҳам.
Қўлбола услубда тайёрланган воситалар
Антифогларнинг афзаллиги унинг линзалар учун хавфсизлигидадир. Агар яна бир бошқа муқобил вариантдан фойдаланмоқчи бўлсангиз, аввал кўзойнакларингизни махсус қоплама (масалан, олеофоб ёки ултрабинафша нурларга чидамли қопламалар) мавжудлигини текширинг. Ушбу техник хусусиятлар, одатда, линза ишлаб чиқарувчи компанияларнинг веб-сайтида келтирилган бўлади.
Ҳеч қандай чекловлар топмасангиз, стаканга оддий суюқ совун, юмшоқ шампун ёки идишларни ювиш воситасидан бир оз миқдорда аралаштиринг. Қоришмани тозаланган линзаларга бир неча томчи суринг ва юпқа ойналар бўйлаб бир текисда пахтали диск ёрдамида ёйиб чиқинг. Кўзойнакни тўлиқ қуриши учун қолдиринг, кейин уларни юмшоқ, из қолдирмайдиган мато билан яхшилаб артиб олинг.
Қайси воситалардан фойдаланмаган маъқул?
Интернетда аксар ҳолларда махсус воситаларни алмаштириш учун бошқа мавжуд вариантларни маслаҳат берилади. Тиш пастаси, глицерин ва автомобиль ойналарини тозалаш учун спрейлар шулар жумласидандир. Ушбу рўйхатдагиларнинг ҳеч қайсисидан фойдаланишни тавсия этмаймиз. Тиш пастасида линзаларни осонгина тирнайдиган абразив моддалар мавжуд, глицеринни шишага текис ва чизиқларсиз суриш қийин, автомобиль спрейлари, одатда, кучли моддалардан таркиб топади ва ҳоказо.
Яна нима ёрдам бера олади?
Қуйидаги маслаҳатлар профилактика учун фойдадан ҳоли эмас:
- Линзаларга тегманг. Бармоқлардан қолган ёғ излари ва бошқа ифлослантирувчи моддалар конденсация ҳосил бўлишини кучайтиради, шунинг учун кўзойнакка қўл тегизмасликка ҳаракат қилинг. Кўзойнакларни мунтазам равишда махсус салфеткалар билан артиб туришни унутманг. Артаётганда кийимдан ёки оддий кундалик сочиқдан асло фойдаланманг. Дағал толалар линзаларга зарар етказиши мумкин.
- Кўзойнакни фақат ўз қолип идишида сақланг. Нам томчилари ҳам биринчи галда майда тирналган жойларга ёпишади, шунинг учун ҳимоя аксессуаридан фойдаланишни унутманг.
- Кўзойнакни бурун устидан тақинг. Улар юзга қанчалик яқин бўлса, шунчалик кўп терлашга мойил бўлади. Ҳавонинг эркин айланишини таъминлаш учун кўзойнакни ўзингизга қулай ҳолда тақинг: юзга ўта яқин ҳам эмас, узоқ ҳам эмас. Агар бурунга тушиб қолаверса, рамкалар мустаҳкамлигини текшириб олиш керак.
Мавзуга доир:
Изоҳ (0)