Чангютгич аввалгидек тортмай қўйдими? Эҳтимол, сиз ундан нотўғри фойдаланаётгандирсиз? Уй ишларида беминнат ёрдамчингизни нима ишдан чиқариши мумкинлигини, уни қандай тузатиш ёки олдини олиш йўлларини қуйида батафсил билиб олинг.
Ҳар қандай техника йиллар ўтиб эскиради ва чангютгичлар ҳам бундан мустасно эмас. Аммо қимматбаҳо қурилмани тез бузиб қўймаслик учун унинг “заиф томонлари” ҳақида билиб қўйган яхши. Одатдагидек чангни тортмай қўйишининг энг кўп учрайдиган сабабларидан тортиш қувватининг йўқолиши, двигателнинг ҳаддан ташқари қизиши ёки тозалаш пайтида ёмон ҳиднинг пайдо бўлишидир. Яхшики, кўпчилик бу муаммолардан тўлиқ халос бўлишнинг имкони бор.
Чангютгич яхши тортмаса
Чанг йиғувчи қоп ёки қути узоқ вақт давомида тозаланмаган бўлса, аниқки, чангютгич тўлиқ қувват билан ишлай олмайди, шунчаки чангни сўриш учун бўш жой қолмаган бўлади. Бу қоида, шубҳасиз, ҳаммага маълум, аммо баъзи ишлаб чиқарувчилар чанг идишини 2/3 қисми тўлганида, яъни битта умумий ёки бир нечта кичик тозалашдан кейин бўшатишни тавсия қилади. Чангютгични тўла чанг идиши билан ишлацангиз, бу нафақат самарасиз, балки унинг ҳаддан ташқари қизиб кетишига сабаб бўлади.
Чангютгич чангни тортиб олишни тўхтатгани сезсангиз, қуйидагиларни бажариб кўринг:
- Чанг идишини бўшатинг;
- Шлангда бирор нима тиқилиб қолмаганини текширинг;
- Шлангнинг чангютгичга уланадиган жойни, у ерда ҳам нимадир тиқилиб қолганми йўқми, текширинг;
- Чўтка ва роликка қаранг, унга ўралиб қолган барча нарсаларни олиб ташланг.
Аксар ҳолларда, ушбу муаммоларни бартараф этиш чангютгични олдингидек ишлаши учун етарли бўлади.
Чангютгич бирданига қизиб кетиб, бир неча дақиқадан сўнг ўчиб қолса
Чангютгич қизиб кетиши ва бир муддатдан сўнг ўчиб қолиши мумкин ва бу хавотирли муаммо эмас. Чангютгич двигатели 100 даражадан юқори ҳароратгача қизиб кетса, двигателни автоматик ўчирадиган сенсор ишга тушади. Бу функция жиддийроқ бузилишнинг олдини олиш учун керак. Двигатель кўпинча ёмон тортиш туфайли қизиб кетади, бу филтрларда чанг ҳаддан ташқари кўп тиқилиб қолса пайдо бўлади.
Филтрларни ўзингиз тозалаб, чангютгич ишлашини қайтадан текшириб кўринг. Дарвоқе, бу ишни мунтазам равишда, камида бир неча ойда бир марта бажаринг. Вакуум филтрларини тозалаш жараёни моделга қараб ўзгариши мумкин. Баъзиларини оддийгина сув остида суюқ совун билан ювиш мумкин. Бошқалари эса бир неча ойда янгилари билан алмаштирилиши керак. Филтрларни қандай сақлаш бўйича кўрсатмаларни топинг, лозим бўлса, алмаштириш учун филтр тўпламига буюртма беринг, улар алоҳида сотилади.
Филтрларни ўзингиз ювган бўлсангиз, улар буткул қуриганига ишонч ҳосил қилиш учун бир неча кун кутиб туринг ва чангютгичдан фойдаланманг. Ҳатто, тоза филтр ҳам етарлича қуруқ бўлмаса, ишламай қолиши ҳеч гап эмас. Филтрни алмаштириш ва тозалаш частотаси чангютгич моделига боғлиқлигини ёдда тутинг. Буларнинг барчаси, одатда, кўрсатмаларда белгиланган бўлади. Циклонли идишларга эга чангютгичлар филтрлари тезроқ тўлиб қолади, шунинг учун уларни доимий кузатиб туринг.
Поролон филтр
Бир бўлак поролон, одатда, чангютгичдаги ҳаво тозалагичга ёки двигателнинг кириш қисмига ўрнатиладиган бўлади. Уни идиш ювиш воситалари билан илиқ сувда ювиш ва кўп марта қайта фойдаланиш мумкин.
Қоғоз филтр
Бу турдаги филтрлар қоғоздан иборат бўлиб, вақт ўтиши билан ифлосланади, уни ювиш мумкин эмас, чўтка билан тозалаб, қайта ўрнатиб қўйиш керак. Лекин олиб бўлмайдиган заррачалар қолади, шунинг учун қоғоз филтрларни вақти-вақти билан янгисига алмаштириш зарур.
Чангютгичдан ҳид тарқалса
Энг кўп учрайдиган сабаб — чангютгичда нам бўлиши. Агар нам жойларни тозалаш учун чангютгичдан фойдаланманг, у билан ҳўл қолдиқларни ва нам чангни тозалашга уринманг. Ичкарида тутиб қолинган намлик бактерия ва моғорларнинг кўпайишига сабаб бўлади, бу эса ёқимсиз ҳидни келтириб чиқаради. Бундан ташқари, намлик шлангга ҳам, трубага ҳам тушиб, унинг деворларида чирк тўплана бошлайди. Яна ўша эслатма: агар филтрларни ўзингиз ювган бўлсангиз, уларни яхшилаб қуритинг. Қолган сув томчилари ҳам чиришга, моғорланишга ва натижада ёқимсиз ҳиднинг пайдо бўлишига олиб келади.
Чангютгични тўлиқ қувват билан ишлатманг
Уйдаги аксарият юзаларни ўртача қувватда тозаласа бўлади. Негадир кўпчилик ҳар доим чангютгични тўлиқ қувват билан ишлатади, моторга ортиқча юк ҳисобланади. Бундан тозалаш сифати яхшиланмайди, двигателнинг эскириши ошади, электр энергияси кўпроқ сарфланади ва ўзингиз ҳам тез чарчайсиз. Шу билан бирга, сифатли тозалаш сири нафақат тортиш кучида, балки тўғри техникада ҳам ётади. Шунчаки шошилишмасдан ва хонанинг периметри бўйлаб секинроқ ҳаракат қилиш кифоя.
Ҳар қандай юзани чангютгич билан тозаламанг
Одатда, чангютгичлар хоналарда тўпланган оддий чангдан тозалаш учун ажойиб воситадир. Лекин улар полга тушган ҳар қандай чиқиндини тортиб олиш учун мўлжалланмаган.
Шиша
Синган ойнани чангютгичда тозаламанг. Шиша қирралари шланг ва чанг қопига осонгина зарар етказади, шунингдек, ички қисмларни йиртиб юбориши ва ҳатто, чангютгичга ёпишиб қолиши мумкин. Бу вазиятда супургини қўлга олиб, катта бўлакларни супуриб олиш, кейин нам мато билан майдаларини артиб олиш яхшироқдир.
Соч
Сартарошингиз келиб кетгач, полларингизни чангютгичда тозаламанг. Оддий чангютгич кўп миқдордаги сочларга дош бера олмайди, улар тезда чанг йиғувчи қисмига тўпланиб қолади, чўтка атрофига ўралади ва сиз барча қисмларни бирма-бир обдон тозалашингиз керак бўлади.
Қурилиш чиқиндилари
Таъмирдан кейин қолган қурилиш қолдиқларини чангютгич билан тозалашнинг ҳожати йўқ, унда хонадон чангютгичи бардош бера олмайдиган жуда кўп майда зарралар ва қурилиш чанглари мавжуд. Юпқа чанг филтрларни тезда ёпиб қўяди ва қурилманинг ички деворларини қоплайди. Циклонли контейнерли чангютгичлар ҳам қурилиш чангига мўлжалланмаган.
Катта буюмлар
Кўпинча тозалаш пайтида пайпоқлар, пакетлар, болалар ўйинчоқлари ёки тангалар чангютгичга тушиб этади. Буларнинг барчаси шлангга ёпишиб қолиши мумкин. Кўп ҳолларда нарсаларни бир учидан тортиб олиш осон, лекин бирор нарса маҳкам ёпишиб қолган бўлса, чангютгични ўчириб, қисмларга ажратиб тиқилиб қолган нарсани олиб ташланг. Энг оғир ҳолатларда янги шлангга буюртма бериш лозим. Чангютгич мебелга тиқилиб қолса, ундан шлангни тортиб олманг, шлангда ёриқлар пайдо бўлиб, бунинг натижасида қурилма мустаҳкамлиги ва қувватини йўқотиши эҳтимолдан ҳоли эмас.
Мавзуга доир:
Изоҳ (0)