Покистон расмийлари “куфрона” контентни олиб ташлаш талабларини бажармагани учун Wikipedia веб-энциклопедиясини блоклади. Бу ҳақда Bloomberg хабар берди.
Маълум қилинишича, Wikipedia компаниясига ушбу маълумотларни ўчириш учун 48 соат вақт берилган эди.
“Покистон куфрона контентларни олиб ташламагани учун Wikipedia’ни блоклади”, — дейилади хабарда.
На нашр, на Покистон расмийлари қайси “куфрона” контентни назарда тутгани ҳақида маълумот берилмаган. Бироқ Покистон телекоммуникация бошқармаси мазкур контент олиб ташланса, Wikipediaни блокдан чиқариш масаласини кўриб чиқишга ваъда берган. Покистон қонунларида куфрга нисбатан ўлим жазоси тайинланади.
Аввалроқ “Роскомнадзор” Wikipedia онлайн-энциклопедия маъмуриятидан Россия Бош прокуратура томонидан Украинадаги урушга оид “ишончсиз маълумотлар” дея топилган материалларни ўчириб ташлашни талаб қилганди.
Маълумот ўрнида, кўп тилли онлайн энциклопедия — Википедия 10 йил ичида биринчи марта платформа дизайнини ўзгартирди. Асосий ўзгаришлар — қидирувни соддалаштирадиган мундарижанинг янги версияси ва энциклопедиянинг тилни алмаштириш воситаларининг янгиланиши.
Википедия бу — онлайн энциклопедия бўлиб, унда барча интернет фойдаланувчилари мақолалар яратиш ва таҳрирлаш имкониятига эга.
Ҳозирги вақтда у ўхшаш энциклопедиялар орасида қамрови ва мақолалар сони бўйича энг катта бўлиб, 306 тил бўлимини ўз ичига олади.
Изоҳ (0)