Украина президенти Владимир Зеленский Россия президенти Владимир Путин билан музокаралардан бош тортмоқда, чунки у Россия раҳбари тириклигига шубҳа қилади. Бу ҳақда Зеленский 19 январь куни Давосдаги форум доирасида айтиб ўтди.
«Бугунги кунда мен ким билан, нима ҳақида гаплашиш кераклигини унчалик тушунмаяпман. Баъзи-баъзида хромакей (матодан қилиниб, фото ва видео съёмка учун мўлжалланган яшил рангдаги орқа фон)да кўриниш берадиган ўша Россия президенти ҳақиқатан ҳам ўзи эканлигига ишончим комил эмас. Унинг тириклигини, қарорларни унинг ўзи қабул қилишини ёки қарорларни бошқа кимдир чиқаришини охиригача тушунмайман. Бу қанақа шахслар доираси? Менда ҳеч қандай маълумот йўқ», — деди Украина президенти.
Ўз навбатида, Россия президенти матбуот котиби Дмитрий Песков Путиннинг тириклигини ва қарорларни ўзи қабул қилаётганини гумон остига олган Украина етакчисининг гапларига жавоб қилди.
«Россия ҳам, Путин ҳам Украина ва Зеленский учун катта муаммо эканлиги тушунарли. Руҳий нуқтаи назардан, Зеленский Россия ҳам, Путин ҳам бўлмаслигини афзал билиши ҳам тушунарли. Аммо Украина режими Россия ва Путин борлигини ва бундан кейин ҳам мавжуд бўлишини, эртами, кечки Россияга қарши нарсалардан воз кечишга тўғри келишини қанчалик эрта англаб етса, Украина каби мамлакат учун шунчалик яхши бўлади», — деди Песков.
Кремлдагилар фикрича, Киев Россиянинг «шундоқ ҳам ҳар қанақасига эришиладиган талабларини ҳисобга олишга тайёрлигини қанчалик тез намоён қилса, ҳамма нарса шунчалик тез тугайди ва Украина халқи Киев режими айби билан юз берган фожиадан кейин шунчалик тез қайта тиклаш ишларига киришади».
Изоҳ (0)