Тожикистон ўзининг илк мобил телефонлари — Вира (форсча «ақлли») деб номланган «кнопкали» телефонлар ишлаб чиқаришни бошлади. Бу ҳақда «Asia-Plus» нашри ишлаб чиқарувчи корхона ҳисоботига таяниб, хабар берди.
Хабарга кўра, биринчи модель — Вира Модель В1 Душанбедаги «Ориён электрони» заводида йиғилади. Эҳтиёт қисмлар ва бутловчи қисмлар Таиланд, Корея, Хитой, Тайван ва бошқа мамлакатлардан келтирилади.
Телефон хотираси 100 Мб ни ташкил қилади. Унга 32 Гб хотира картасини ўрнатиш мумкин. Қурилма флешли 1,3 мегапикселли олд камерага эга. Батарея 4—5 кунга етади. Ушбу телефон ёрдамида радиони қўшимча дастурлар ва наушникларсиз тинглаш мумкин.
Телефоннинг интерфейси ва операцион тизими 4 тилда — инглиз, форс, турк ва рус тилларида яратилган, чунки ишлаб чиқарувчи компания ўз маҳсулотларини экспорт қилишни режалаштирмоқда.
Изоҳ (0)