Францияда ҳукумат томонидан режалаштирилаётган пенсия ислоҳоти ҳамда пенсия ёшини икки йилга оширишга қарши оммавий норозилик намойишлари ва иш ташлашлар бошланди. 19 январь куни кўплаб бошланғич мактаблар ёпилди, давлат ва юридик телерадиокомпаниялар ўзларининг мунтазам дастур ва мусиқа эшиттиришларини тўхтатди, темир йўл ва шаҳар транспорти кескин чекланди. Париж аэропортларида кўплаб рейслар бекор қилинди.
Франция миллий EDF энергетика концерни ходимлари электр энергияси ишлаб чиқаришни бироз қисқартирди. ОАВ маълумотларига кўра, иш ташлашда TotalEnergies нефтни қайта ишлаш заводлари ишчиларининг 70 фоиздан 100 фоизигача иштирок этган. Куннинг биринчи ярмидаёқ Ницца, Марсель, Тулуза ва бошқа шаҳарларда намойишлар бошланган. 200 дан ортиқ шаҳардаги намойишларда юз минглаб одамлар иштирок этиши кутилмоқда.
«Демократик меҳнат конфедерацияси» (CФДТ) раҳбари Филипп Мартин 19 январни «энг кучли норозлик куни» деб атади. Унинг сўзларига кўра, бу камдан-кам учрайдиган ҳолат бўлиб, барча касаба уюшмаларини норозилик намойишига чақириш муаммонинг жиддийлигидан далолат беради.
Пенсия ислоҳоти — Макроннинг сайловолди кампаниясидаги асосий ваъдалардан бири
Макрон ҳукуматининг ислоҳот режасига кўра, 2030 йилгача энг кам пенсия ёши босқичма-босқич 62 ёшдан 64 ёшга кўтарилади. Ҳар йили пенсия ёшини уч ойга ошириш таклиф қилинмоқда. Бош вазир Элизабет Борннинг айтишича, биринчи босқич 1 сентябрга режалаштирилган. Ҳукумат раҳбари ислоҳотдан кўзланган мақсад пенсия таъминотининг мувозанатли тизимини таъминлаш эканини таъкидлади. Шу билан бирга, у режа французлар орасида «савол ва хавотирлар уйғотаётганини» ҳам тан олди.
CФДТ касаба уюшмаси бош котиби Лоран Бергенинг сўзларига кўра, бу ўзгариш, айниқса, фаолиятини эрта бошлаган ишчиларга таъсир қилади. «Пенсия тизими хавф остида эмас, бундай қаттиқ ислоҳотни ҳеч нарса билан оқлаб бўлмайди», — деди у бошқа касаба уюшма ташкилотлари раҳбарлари билан учрашувда. Берге 19 январни умуммиллий иш ташлашнинг биринчи куни деб эълон қилган.
Францияда ҳозирги пенсия ёши 62 ёш, аммо агар фуқаро ўша ёшда нафақага чиқишни танласа, у пенсияни тўлиқ миқдорда олмайди. 2019 йилда француз ҳукумати 2025 йилдан бошлаб тўлиқ пенсия олиш учун камида 64 ёшга тўлгунга қадар ишлаш кераклиги ҳақида лимит белгилаганди. Бундай ҳолда, шахс 1000 евро миқдорида кафолатланган тўловни талаб қилиши мумкин бўлади.
Ўтган баҳорда, президентлик сайловларидан бир неча ҳафта олдин Макрон, агар у қайта сайланса, Францияда пенсия ёши секин-аста 65 ёшга кўтарилишини айтганди. Бу «иш ва вазифаларнинг реаллигини ҳисобга олиш» имконини беради ҳамда кексалар ўртасида ишсизликка қарши курашда ҳам ёрдам беради, деган у.
Изоҳ (0)