Прогнозлаштириш ва макроиқтисодий тадқиқотлар институти (ПМТИ) экспертлари ҳудудлар бўйича саноат маҳсулотларини ишлаб чиқаришнинг ривожланиш даражасини баҳолади.
Тадқиқотда мамлакатдаги ҳудудий номутаносибликлар туманлар бўйича баҳоланди ва бунда қиёсий таҳлил ва гуруҳлаш усулларидан фойдаланилди.
Натижаларга кўра, саноат маҳсулотларини ишлаб чиқариш даражаси бўйича Ўзбекистон ҳудудлари 4 гуруҳга ажратилди:
I гуруҳ — саноати нисбатан ривожланган туманлар (аҳоли жон бошига ишлаб чиқариш ҳажми мамлакат даражасидан юқори — 2021 йилда 12,9 млн сўм) ҳудудида асосий йирик саноат объектлари (асосан ёқилғи-энергетика, кимё комплекси, машинасозлик, металлургия) жойлашганлиги билан ажралиб турадиган 16 та туманни ўз ичига олди.
II гуруҳ — саноатнинг ривожланиш даражаси ўртача (аҳоли жон бошига ишлаб чиқариш ҳажми мамлакат кўрсаткичидан 5 бараваргача кам) бўлган 101 та туман киритилди.
Улар Ўзбекистондаги туманларнинг 62,3 фоизини ташкил этади. Бу ҳудудлар истеъмол товарларини ишлаб чиқаришга (енгил, озиқ-овқат саноати, қурилиш материаллари) ихтисослашгани, ривожланган ёки ривожланаётган кичик бизнес субъектлари билан ажралиб туради.
Уларнинг асосий қисми Қорақалпоғистон Республикаси (11 та), Андижон (11 та), Бухоро (9 та), Навоий (7 та), Наманган (8 та), Тошкент (10 та) вилоятларида жойлашган.
III гуруҳ — саноатнинг ривожланиш даражаси нисбатан паст ҳудудлар (аҳоли жон бошига ишлаб чиқариш ҳажми мамлакат кўрсаткичидан 10 бараваргача кам) бўлиб, 37 та туманни ўз ичига олади.
Бундай туманлар ресурслар билан таъминланган Қашқадарё (5 та), Самарқанд (5 та), Сурхондарё (5 та), Фарғона (4 та) вилоятлари ва Қорақалпоғистон Республикасида (4 та) жойлашган бўлиб, уларнинг ишлаб чиқариш жараёнидаги иштирокини максимал даражада ошириш бўйича чора-тадбирлар кўрилиши лозим.
IV гуруҳ — (аҳоли жон бошига ишлаб чиқариш ҳажми мамлакат кўрсаткичининг 10 бараваридан кам) марказдан узоқда ёки тоғолди зонасида жойлашган 8 та туман (Бахмал, Янгиқўрғон, Қўшработ, Олтинсой, Денов, Бойсун, Сўх) киради.
Бу ҳудудлар саноати асосан ижтимоий аҳамиятга молик товарларни ишлаб чиқариш ҳисобига шаклланган бўлиб, уни янада ривожлантириш учун тадбиркорлик ва инвестиция фаолиятини фаоллаштириш, қулай муҳандислик-коммуникация инфратузилмасини яратиш зарур.
Умуман олганда, 2018—2021 йилларда саноатнинг ўртача ривожланиш даражасига эга бўлган туманлар сони 83 тадан 101 тага ортиб, ривожланиш даражаси пастлари 46 тадан 37 тага ҳамда қониқарсиз кўрсаткичларга эга бўлганлари сони 14 тадан 8 тага камайди.
Бу ҳолатни маҳаллий салоҳият ва ресурслардан самарали фойдаланиш, қишлоқ жойларда тадбиркорлик ва инвестицион фаоллик ортишининг самараси сифатида изоҳлаш мумкин.
Изоҳ (0)