Иқтисодчилар 2023 йилда АҚШда рецессия бўлишини кутмоқда

Иқтисодчилар инфляциянинг пасайиш белгиларига қарамай, юқори фоиз ставкалари ҳамон АҚШ иқтисодиётини рецессияга олиб келишини кутишмоқда. Бу ҳақда The Wall Street Journal хабар бермоқда. 

Мутахассислар АҚШ учун келгуси ўн икки ой ичида рецессия эҳтимолини 61 фоиз деб баҳоламоқда, бу октябрь ойидаги 63 фоиз кўрсаткичдан унчалик фарқ қилмайди.

Дастлаб Федерал резерв тизими (Фед) «юмшоқ қўниш» деб номланган иқтисодий ўсишни секинлаштириш орқали инфляцияни сусайтириши мумкин. Бироқ респондентларнинг тўртдан уч қисми Фед 2023 йилда «юмшоқ қўниш»га эриша олмаслигини айтган.

Шу билан бирга, инфляция прогнози яхшиланди. Иқтисодчилар жорий йил охирига келиб у 3,1 фоизга тушишини кутмоқда, октябрь ойида эса прогноз 3,3 фоизни ташкил этганди. 

2024 йил охирига келиб инфляция 2,4 фоизга тушиши кутилмоқда — бу прогноз аввалги сўров натижалари билан деярли бир хил.

Мавзуга доир: Ҳамма гапираётган рецессия ўзи нима?

АҚШда инфляция декабрь ойида ўтган йилнинг шу даврига нисбатан 6,5 фоизга ўсди. Шунга қарамай, нархлар ошиши июнь ойидаги энг юқори кўрсаткич — 9,1 фоизга нисбатан секинлашган.

Айрим таҳлилчилар томонидан мустаҳкам инфляция, қаттиқроқ молиявий шароит ва заиф глобал ўсиш комбинацияси 2023 йилнинг биринчи ярмида АҚШ иқтисодиётига енгиллик олиб келишини кутмоқда.

Умуман олганда, 2023 йил охирига келиб иқтисодчилар ялпи ички маҳсулот 0,2 фоизга ошишини кутмоқда. Октябрь ойида улар ўсишни 0,4 фоиз деб баҳолаган эди.

Прогнозларга кўра, Америка компаниялари жорий йилнинг иккинчи чорагидан бошлаб ходимларни қисқартиради. 

Натижада 2023 йилда мамлакат иқтисодиётида иш ўринлари сонининг ўртача ойлик қисқариши қарийб 7 мингтани ташкил этади. 

Мутахассислар Фед бу йил фоиз ставкаларини йиллик 5 фоизга оширишини кутмоқда, бу унинг ҳисоб-китобларига мос келади.

Америка ҳукумати рецессияни эълон қилиш ваколатидан бутунлай воз кечган. Бу ваколат Иқтисодий тадқиқотлар миллий бюросига — хусусий, нотижорат тадқиқот гуруҳига тегишли.