1946 йилда биринчи тижорат мақсадида ишлаб чиқарилган микротўлқинли печ кўп вақт талаб қиладиган ошпазлик ишларидан озод қилди. Кўпчилик, албатта, унда овқат иситади, аммо бу қурилманинг имкониятлари анча кенгроқ. AdMe нашри микротўлқинли печдан фойдаланишда асқатадиган лайфхаклар билан бўлишди.
Пиширилган гуруч музлаткичда бир неча кун сақлангандан кейин қаттиқлашиб қолиши мумкин. Муз бўлаги ва микротўлқинли печ гуручни яна юмшоқ қилишига ёрдам беради. Бунинг учун муз бўлаги гуруч юқорисига қўйилади ва иситилади. Музнинг эриб буғланиши натижасида гуруч аввалгидек юмшоқ ҳолатга қайтади.
Агар бир неча кун олдин сотиб олинган кўкатлар бутунлай қуриб кетаётганини сезсангиз, уларни ташлаб юбормаслик керак. Микротўлқинли печда қуритиб, кейинроқ таомларга қўшиш учун шкафда сақлаш мумкин.
Микротўлқинли печга 45 сонияга пиёз бутунлигича қўйилади. Иссиқлик кўзнинг ёшланишига олиб келадиган кимёвий моддаларни парчалайди. Сўнгра пиёзни кўз ёшларсиз тўғраш мумкин.
Рецептига кўра, қуритилган меваларни бир кеча сувда ивитиш керак бўлса ва бу ёддан кўтарилса, микротўлқинли печ яна ёрдамга келади. Қуритилган меваларни махсус идишга солиб, керакли суюқлик билан тўлдирилади. Усти плёнка билан ёпилиб, 2 дақиқа давомида юқори қувватда қиздирилади. Кейин печдан чиқариб олинади ва совитишга қўйилади.
Помидорнинг қобиғини тозалаш учун устига қайноқ сув қуйишга одатланганмиз. Лекин буни тезроқ бажариш мумкин. Бунинг учун помидор ювилади. Помидорнинг таги кесиб қўйилади ва сувли идишга солиб, печга қўйилади. Сув бир зумда буғланиб, помидорнинг пўстини тозалашни осонлаштиради.
Саримсоқни тозалаш учун кўп вақт кетади. Кейин қўллар узоқ вақт давомида ҳидланади. Буни осон тарзда амалга ошириш мумкин: маҳсулот микротўлқинли печда 15 сония давомида қиздирилади. Сўнгра саримсоқни тозалаш янада осонлашади.
Хамир кўтарилиши учун иссиқ жой керак, бу эса совуқ ойларда қийин бўлиши мумкин. Аммо бошқа ечими бор, микротўлқинли печга бир пиёла сув 2 дақиқага, сўнг хамир қўйилади (пиёлани олиб ташлашнинг ҳожати йўқ) ва у бироз вақтга қолдирилади. Хамир тезда кўтарилади.
Асални эритиб олиш учун микротўлқинли печга қўйилади. Ўртача қувватда 30-40 сония давомида қиздирилади. Аниқ вақт жиҳознинг кучига ва асал миқдорига қараб фарқ қилиши мумкин. Кейин асал олиниб, яхшилаб аралаштирилади.
Агар нон бутунлай қотиб қолиш арафасида бўлса, уни яна юмшоқ ва мазали қилиш мумкин. Шунчаки эскирган нон нам салфетка билан ўралади ёки бир стакан сув билан микротўлқинли печга қўйиш мумкин, у янада юмшоқроқ бўлади.
Изоҳ (0)