Уйда кир ювиш машиналари пайдо бўлиши билан унда ҳамма нарсаларни ювиб кўриш бошланди. Аммо ҳамма мато ҳам ўзига яраша хусусиятларга эга, улар инобатга олинмаса, ювилиш жараёнида кийимларга путур етиши мумкин. Масалан, чарм курткани уй шароитида ювиш мумкинми? «Новий очаг» нашри қуйида ушбу саволга жавоб берди.
Аввало асл чарм маҳсулотларини ҳеч қачон кир ювиш машинасида ювиб бўлмайди. Бундай йўл тутиш кийимнинг кўринишига путур етказади, тери ёрилиб кетади, деформацияланади ва ҳатто рангини йўқотиши мумкин. Агар чарм куртка билан ёмғирда қолиб кетилса, уни илгичга осиб, иссиқ ва қуруқ хонага қўйиш лозим. Буни амалга оширишдан олдин калит, занжирлар ва бошқа буюмларни чўнтакдан олиб ташлашни унутмаслик лозим. Ҳақиқий теридан тикилган устки кийим ёрилишининг олдини олиш учун иситкич ёки унинг панжарасидан узоқроқда қуритиш лозим.
Чарм куртка намликдан қўрқмайди, бунинг учун чармга намликни сингдирувчи воситадан фойдаланиш лозим. Уни ҳар қандай пойабзал, косметика ва маиший дўконлардан харид қилиш мумкин. Курткадаги доғларнинг олдини олиш учун воситани бир текис қатламда тахминан 30 сантиметр масофадан сепиш керак.
Чарм курткалар этиклар каби эҳтиёткорликни талаб қилади. Вақти-вақти билан унга парвариш қилиш воситаларини қўллаш керак бўлади. Бунинг учун вазелин ва глицерин ҳам ёрдам беради, аммо кимё саноатининг замонавий ютуқларидан фойдаланиш яхшироқдир. Юмшоқ чарм учун суюқ парваришлаш воситалари, шунингдек, махсус чўтка керак бўлади.
Агар чарм қуриб, ёрилиб кетганини кўрсангиз, кондиционер ёки пенкали намлантирувчи ёрдам беради. Ушбу воситалар чарм юмшоқ бўлгунча такроран суртилади.
Агар чарм куртка кир бўлса, шунчаки нам латта билан доғни артиб олиш мумкин. Фақат бу вазиятда шунчаки нам салфеткалардан фойдаланмаслик керак, улар чарм рангини ўзгартириши ёки қуришига олиб келиши мумкин. Борди-ю, чарм юзасида кучли доғ ёки уй шароитида тозалаб бўлмайдиган кирлар бўлса, уни тозалашни мутахассисларга топшириш тавсия этилади.
Изоҳ (0)