Агар Хитой 2026 йилда Тайванга бостириб кирса, бу ҳарбийлар орасида минглаб қурбонларга олиб келади, аммо Пекин ғалаба қозониши амри маҳол. Бу ҳақда ҳарбий низонинг катта кўламли симуляциясини амалга оширган Стратегик ва халқаро тадқиқотлар маркази (CSIС) ҳисоботида айтилади, деб ёзади CNN ҳужжат нусхасига таяниб.
Ҳисобот «Кейинги урушнинг биринчи жангги» деб ном олди. CSIС «Хитой истилоси муваффақиятли бўладими ва у қандай оқибатларга олиб келади?» — деган иккита асосий саволга жавоб бериш учун 24 марта симуляция ўтказди. Экспертлар томонларнинг барчаси «улкан» талафотлар кўради, деган хулосага келди. Кўпчилик сценарийлар бўйича АҚШ Ҳарбий-денгиз кучлари иккита авианосец, 10 дан 20 тагача йирик сувусти кемаларини йўқотиши кутилмоқда, шунингдек, қарийб 3200 нафар америкалик ҳарбий хизматчиалр ўлдирилади. Хитой ҳарбий-денгиз флоти ва «ядро-десант кучлари», шунингдек, 10 мингга яқин ҳарбийларидан айрилади, деб ҳисоблайди CSIС.
Тайваннинг эҳтимолий йўқотишлари эса қарийб 3500 ҳарбийдан иборат бўлади, 26 та эсминеци ва фрегатларининг барчаси эса чўктириб юборилади. Бундан ташқари, Япония 100 дан ортиқ жанговар самолётлари ва 26 та ҳарбий кемаларидан ажралиши мумкин, унинг ҳудудидаги АҚШ ҳарбий базалари эса Хитой томонидан ҳужумга учрайди.
Шу билан бирга, экспертлар таъкидлашича, Тайванга ҳужум қилинган тақдирда, қурол-яроғ етказиб бериш бўйича «украин модели»ни амалга ошириш мумкин бўлмайди. «Уруш бошланганидан кейин Тайванга қўшинлар ёки ўқ-дориларни етказиш мумкин бўлмайди, шунинг учун вазият Украинадаги ҳолатдан тубдан фарқ қилади. Тайванликлар уруш олиб боришда нималардан фойдаланмоқчи бўлса, у бошланган вақтда улар қўл остида бўлиши керак», — деди лойиҳанинг уч раҳбаридан бири, CSIС катта маслаҳатчиси Марк Канчиан.
Шу билан бирга, марказ Хитой ва Тайван уруши «муқаррар ёки ҳатто эҳтимолий» эканини айтмаяпти. «Хитой ҳукумати Тайванга қарши дипломатик изоляция, босим ёки иқтисодий мажбурлаш стратегиясини қабул қилиши мумкин», — дея аниқлик киритилади ҳисоботда.
Тайван кўрфазидаги вазият 2022 йил августида АҚШ Конгресси спикери Нэнси Пелоси Хитой ўз ҳудуди деб ҳисоблайдиган Тайванга ташриф буюрганидан кейин кескинлашди. 25 декабрь куни Хитой армияси Тайван яқинида ҳарбий машғулотлар ўтказди. 26 декабрь куни Тайван ҳукумати ўзининг ҳаво ҳужумига қарши мудофаа зонасига жуда катта сонли Хитой ҳарбий самолётлари бостириб кирганини маълум қилди.
Изоҳ (0)