Франция президенти Эммануэль Макрон Украинадаги низо бўйича фикрлари ва Владимир Путин билан олиб борган суҳбатлари ҳақида гапириб берди.
«У билан кўришганингизда у сизга ёқимсиз одам бўлиб туюлмайди. Парадокс мана шундан иборат», — деди у Les Rencontres du Papotin теледастурига берган интервьюсида.
Макроннинг фикрича, Украинадаги ҳарний ҳаракатлар «Россиянинг қачонлардир мавжуд бўлган империя давридаги ҳудудларини қайтариш ва чегараларини кенгайтириш» мақсадида бошланган.
The Telegraph ёзишича, бу интервью ноябрда, Макрон Украинадаги низо бўйича ўз сиёсатини омма олдида ўзгартиришидан аввалроқ ёзиб олинган. Дастлаб Франция президенти Москва ва шахсан Путин билан музокараларни давом эттиришнинг асосий тарафдорларидан бири эди. Аммо сўнгги ҳафталарда Париж сиёсати ўзгариб кетди. Франция Украинага Ғарбда ишлаб чиқарилган танклар (енгил ғилдиракли AMX-10 RC танклари)ни етказиб берган биринчи мамлакатга айланди.
2022 йилда Франция Украинага гуманитар ёрдам сифатида жами 200 миллион евро йўналтирди, яқин орада Париж энергия таъминотини қайта тиклаш учун Киевга яна 76,5 миллион евро ажратади, деган эди Макрон декабрь ўрталарида. Бундан ташқари, шу қишда Франция Украинага ҳаво ҳужумига қарши мудофаа тизимларини юборишни бошлади.
5 январь куни Франция ташқи ишлар вазири Катрин Колонна Париж ҳамон Россия билан мулоқотни сақлаб қолиш зарур деб ҳисоблашини айтди.
Изоҳ (0)