Fransiya prezidenti Emmanuel Makron Ukrainadagi nizo bo‘yicha fikrlari va Vladimir Putin bilan olib borgan suhbatlari haqida gapirib berdi.
“U bilan ko‘rishganingizda u sizga yoqimsiz odam bo‘lib tuyulmaydi. Paradoks mana shundan iborat”, — dedi u Les Rencontres du Papotin teledasturiga bergan intervyusida.
Makronning fikricha, Ukrainadagi harbiy harakatlar “Rossiyaning qachonlardir mavjud bo‘lgan imperiya davridagi hududlarini qaytarish va chegaralarini kengaytirish” maqsadida boshlangan.
The Telegraph yozishicha, bu intervyu noyabrda, Makron Ukrainadagi nizo bo‘yicha o‘z siyosatini omma oldida o‘zgartirishidan avvalroq yozib olingan. Dastlab Fransiya prezidenti Moskva va shaxsan Putin bilan muzokaralarni davom ettirishning asosiy tarafdorlaridan biri edi. Ammo so‘nggi haftalarda Parij siyosati o‘zgarib ketdi. Fransiya Ukrainaga G‘arbda ishlab chiqarilgan tanklar (yengil g‘ildirakli AMX-10 RC tanklari)ni yetkazib bergan birinchi mamlakatga aylandi.
2022-yilda Fransiya Ukrainaga gumanitar yordam sifatida jami 200 million yevro yo‘naltirdi, yaqin orada Parij energiya ta’minotini qayta tiklash uchun Kiyevga yana 76,5 million yevro ajratadi, degan edi Makron dekabr o‘rtalarida. Bundan tashqari, shu qishda Fransiya Ukrainaga havo hujumiga qarshi mudofaa tizimlarini yuborishni boshladi.
5-yanvar kuni Fransiya tashqi ishlar vaziri Katrin Kolonna Parij hamon Rossiya bilan muloqotni saqlab qolish zarur deb hisoblashini aytdi.
Izoh (0)