Fransiya prezidenti Emmanuel Makron Rossiya prezidenti Vladimir Putin bilan bevosita muloqot mamlakatlar o‘rtasidagi hamkorlikni qayta tiklashda muhim rol o‘ynaydi, deb hisoblaydi. Uning fikricha, Rossiya-Ukraina nizosi muzokaralar orqali yakunlanadi va u “boshqa variantlar”ni ko‘rmayapti. Shu bilan birga, uning fikricha, qaror ukrainaliklar tomonidan qabul qilinishi kerak.
“Men prezident Putin bilan muntazam muhokamalar va bevosita aloqani qo‘llab-quvvatlayman, chunki hamkorlikni qayta tiklashning eng yaxshi usuli ushbu to‘g‘ridan to‘g‘ri kanalni saqlab turishdan iborat deb hisoblayman. Izolyatsiya — bu eng yomon narsa, ayniqsa, u kabi yetakchi uchun”, — dedi Makron CBS kanaliga bergan intervyusida.
Fransiya prezidenti Rossiya va Ukraina vakillari bilan norasmiy muzokaralar olib bormayotganini aytdi. Uning so‘zlariga ko‘ra, “norasmiy jarayonlarda hech qachon ishtirok etmaydi” va doim o‘z xatti-harajatlari haqida hisobot beradi. “Har safar prezident Putin bilan suhbatlashganimda, buni umumiy yutuq sifatida qayd etganman”, — dedi u.
Rossiya qo‘shinlari Ukrainaga kirishidan avval va keyin ham Makron Putin bilan ko‘p marta qo‘ng‘iroqlashgan. O‘tgan hafta u Rossiya uchun xavfsizlik kafolatlari haqida o‘ylab ko‘rishni taklif qilgandi. Uning fikricha, Ukrainadagi nizo yakunlangach, Yevropa yangilangan xavfsizlik arxitekturasini barpo etishi kerak bo‘ladi.
Avvalroq Makron Ukrainaga qurol yetkazib berishda davom etishini aytib, kesib o‘tilmaydigan ma’lum qizil chiziqlar ham borligini ta’kidlagan edi.
Ma’lumot o‘rnida, Fransiya Rossiyaning Ukrainadagi “agressiv jinoyatlari”ni tekshirish bo‘yicha maxsus tribunal yaratish ustida ish boshladi. Rossiya Tashqi ishlar vazirligi esa bundan norozilik bildirdi.
Izoh (0)