Бразилияда норозилик намойишлари тугади, деб хабар қилди пойтахт Федерал округи матбуот котиби, Адлия ва жамоат хавфсизлиги вазирлиги ижрочи котиби Рикардо Каппелли. Бу ҳақда у ўзининг Twitter саҳифасида ёзган.
«Федерал округдаги вазият назорат остида. Бир неча соатдан кейин одатий ишимизни давом эттирамиз. Бўлиб ўтган воқеалар обдон текширилади. Жиноятчиларни аниқлаш ва жазолаш давом этади», — дейди Каппелли.
Бразилия собиқ президенти, ўнгчи Жаир Болсонарунинг тарафдорлари 8 январь куни янги президент Луис Инасиу Лула да Сильвага қарши намойиш уюштириб, Бразилия Миллий Конгресси, президент саройи ва мамлакат Олий судига бостириб кирганди. Болсонару 2022 йилнинг кузида ўтказилган сайловларда 49,2 фоиз овоз билан мағлубиятга учраган — да Сильва 50,8 фоиз овоз олган (Болсонару сайловлар сохталаштирилгани даъво қилди, аммо якунда натижаларни тан олди). Намойишчилар овоз бериш натижаларини қайта кўриб чиқишни талаб қилди. Улар ҳукумат биноларида вайронагарчиликлар уюштирди. Федерал округ губернатори Ибанейса Рошининг айтишича, тартибсизликлар ортидан 400 дан ортиқ одам ҳибсга олинган.
Ўз навбатида, Болсонару содир бўлаётган воқеаларни қоралаб, «ўғирлик ва жамоат биноларига кириш белгиланган тартибни бузади», деди. Собиқ президент декабрь ойи охирида, муддати тугашига икки кун қолганда мамлакатни тарк этганди. Ҳозир у Американинг Флорида штатида, Орландода, деб ёзади The New York Times.
Тартибсизликлар бошланган пайтда да Сильва пойтахтда бўлмаган, у сув тошқини оқибатларини текшириш учун Сан-Паулу штатига кетган эди. Президент Бразилияда январь ойи охиригача фавқулодда ҳолат эълон қилди.
Икки йил олдин, 2021 йил январь ойида АҚШда шунга ўхшаш тартибсизликлар бўлиб ўтганди — ўша пайтда собиқ президент Дональд Трамп тарафдорлари Капитолийни эгаллаб олган. Улар ҳам намойишлардан бир неча ой олдин ўтказилган сайлов натижаларини қайта кўриб чиқишни талаб қилишди. Тартибсизликларда бир неча киши ҳалок бўлган, юзлаб одамлар яраланганди.
Изоҳ (0)