Қуруқ юк ташийдиган Глорй кемаси Миср шимолидаги Ал-Қантара шаҳри яқинида Сувайш каналида саёзликка ўтириб қолди. Шатакчи кемалар кемани саёзликдан чиқаришга ҳаракат қилмоқда. Бу ҳақда Мисрнинг Летҳ Agencies кемачилик агентлиги хабар берди.
«Глорй юк кемаси жанубга қараб йўл олган кемалар карвонига қўшилаётиб, Ал-Қантара яқинида саёзликка ўтириб қолди», — дейилади Летҳ Agencies хабарида.
АП хабарига кўра, кема Украинадан Хитойга қарийб 65 минг тонна маккажўхори олиб кетаётган эди. VesselFinder сервисига қараганда, кема Marshall ороллари байроғи остида ҳаракатланган.
Кейинроқ генерал-лейтенант Усаму Рабие кеманинг тўхтаб қолишига унинг саёзликка ўтириши эмас, балки ундаги носозликлар сабаб бўлганини маълум қилди. Унинг гапларини Мисрнинг ШороукNews портали келтириб ўтди.
Глорй кемаси дон битими доирасида Украинадан озиқ-овқат маҳсулотларини олиб кетишда иштирок этмоқда. Marine Traffic сервиси маълумотларига кўра, 24 декабрь куни кема Украинанинг Черноморск портидан чиққан. Унинг узунлиги 225 метрга тенг.
Эслатиб ўтамиз, 2021 йил 23 март куни дунёдаги энг йирик контейнер ташувчи кемалардан бири Ever Given Сувайш каналида саёзликка ўтириб қолганди. Натижада канал бўйлаб ҳаракат бутунлай тўсилиб қолганди, бу эса кўп миллионлик зарар келтирди. Юк ташувчилар Яхши умид бурнини айланиб ўтувчи бошқа, узунроқ йўлдан юришига тўғри келганди.
Изоҳ (0)