Ўзбекистонда 2025 йилнинг биринчи ярмида 1 миллион нафарга яқин фуқаро ўз кредит тарихини текширтирди.
Кредит-ахборот таҳлилий маркази маълумотларига кўра, кредит ҳисоботларидан фойдаланганлар сони 957 402 нафарни ташкил этди. Шундан 99 фоизи жисмоний шахслар, 1 фоизи эса юридик шахслардир. Кредит ҳисоботларидан фойдаланганлар сони 2024 йилнинг шу даврига (400 950) нисбатан қарийб 2,4 баробарга ошди.
Ёш тоифасига кўра бу қуйидагича бўлди:
- 26—35 ёшдагилар — 41 фоиз (388 456 киши),
- 36—45 ёшдагилар — 23 фоиз (222 247 киши),
- 16—25 ёшдагилар — 22 фоиз (205 009 киши),
- 46—55 ёшдагилар — 9 фоиз (88 093 киши),
- 56 ёш ва ундан катталар — 5 фоиз (44 940 киши).
Скоринг баллари таҳлилига кўра, мурожаат қилган фуқароларнинг атиги 5 фоизи (44 482) аъло даражадаги скорингга эга бўлган, 28 фоизида яхши, 55 фоизида эса ўртача кўрсаткич бўлган.
Кредит бюросидан ҳеч қандай сабабларни кўрсатмасдан, йилига фақат бир марта текинга ва исталганча пуллик асосда ўз кредит тарихингиз тўғрисидаги маълумотни олиш мумкин.
Кредит-ахборот таҳлилий маркази маълумотларига кўра, 2025 йил биринчи ярмида жисмоний шахсларнинг аксарияти кредит тарихини олишга бир марта мурожаат қилган бўлиб, уларнинг улуши 63 фоизни ташкил этади. Икки марта мурожаат қилганлар 23 фоиз, уч марта фойдаланганлар 6 фоиз, тўрт марта фойдаланганлар 2 фоиз, беш ва ундан кўп марта фойдаланганлар эса яна 6 фоизни ташкил қилган. Мурожаат қилганларнинг 69 фоизи эркаклар, 31 фоизи аёллар бўлган.
Ҳудудлар кесимида энг кўп мурожаат Тошкент шаҳрида қайд этилган — 19,4 фоиз, ундан кейинги ўринларни Тошкент вилояти (11,9 фоиз) ва Самарқанд вилояти (8,3 фоиз) эгаллади.
Ўзбекистонда банкларга молиявий қийинчиликлар ва мураккаб ҳаётий вазиятларга тушиб қолган, шунингдек, форс-мажор ҳолатлари туфайли ўз вақтида кредит тўловларини амалга ошира олишга қийналаётган қарз олувчиларнинг амалдаги кредитлари бўйича шартнома шартларига ўзгартириш ва қўшимчалар киритиш (реструктуризация) имкониятлари борасидаги аризаларини кўриб чиқиш юзасидан ички тартибга эга бўлиши талаб этилиши кутилмоқда. Шунингдек, қарз олувчилар махсус чек-лист тўлдириши жорий этилади. Фуқаро уни диққат билан ўқиб чиқиши ва ҳар бир бандни тушунганини тасдиқлаши керак.
Изоҳ (0)