Ўзбекистон Европа Иттифоқи билан кенгайтирилган шериклик ва ҳамкорлик тўғрисидаги битимни яқин ойларда имзолайди. Бу ҳақда 2025 йил 18 август куни Шавкат Мирзиёевнинг “Ўзбекистон, Озарбайжон ва Европа: умумий тараққиёт йўлида ҳамкорлик” мавзусида ўтаётган юқори даражадаги учрашув иштирокчиларига йўллаган мурожаатидан маълум бўлди.
Президентнинг сўзларига кўра, Озарбайжон Марказий Осиё ва Европани боғлашда стратегик кўприк вазифасини бажариб келмоқда. Ўзбекистоннинг Европа билан муносабатлари ўзининг мутлақо янги ривожланиш даврини бошидан кечираётганини қайд этди.
“Биз Европа Иттифоқи ва бошқа шерикларимиз билан биргаликда самарали транспорт-логистика ва энергетика йўлакларини ривожлантириш бўйича аниқ мақсадга йўналтирилган ишларни давом эттирамиз. Ишонамизки, ушбу чора-тадбирлар минтақамизнинг Ғарб ва Шарқ ўртасидаги хаб сифатидаги ролини қайта тиклаш имконини беради”, деди Шавкат Мирзиёев.
2024 йилнинг ноябрида Ўзбекистон президенти ва Еврокенгаш раҳбари шерикликни кенгайтириш масалаларини муҳокама қилганди. Кенгайтирилган шериклик ва ҳамкорлик тўғрисидаги янги битимни тез фурсатда қабул қилишга алоҳида эътибор қаратилганди.
2025 йилнинг март ойида Европа Иттифоқининг халқаро ҳамкорлик бўйича комиссарини қабул қилди. Унда сўнгги йилларда икки томонлама ҳамкорлик, жумладан, сиёсий, савдо-иқтисодий, инвестициявий ва маданий-гуманитар соҳаларда жадал ривожланиб бораётгани қайд этилиб, уни изчил кенгайтириш учун катта имконият ва салоҳият мавжудлиги таъкидланганди. Ўзбекистон ва Европа Иттифоқи ўртасида кенгайтирилган шериклик ва ҳамкорлик тўғрисидаги янги битимнинг тез фурсатда имзоланиши ҳам бунга хизмат қилиши маълум қилинганди.
Шу йилнинг апрелида Самарқанд шаҳрида бўлиб ўтган “Марказий Осиё — Европа Иттифоқи” биринчи саммити якунида Марказий Осиё ва Европа Иттифоқи ўртасидаги муносабатларни стратегик шериклик даражасига олиб чиқадиган Самарқанд декларацияси қабул қилинганди.
Изоҳ (0)