9 январь санасига боғлиқ диққатга сазовор воқеалар қаторидан Доғистонда 3 минг кишини асирга олган чечен жангарилари, БМТнинг Нью-Йоркдаги штаб-квартирасининг фойдаланишга топширилиши ҳамда сапотекиларга тегишли ноёб хазинанинг топилишига оид фактлар ўрин олган.
Доғистонда 3 минг кишини асирга олган чечен жангарилари
1996 йил 9 январь санаси Доғистоннинг Кизляр шаҳри тарихида қора кун сифатида қолган. Ҳар йили шу куни кизлярликлар гуллар билан шаҳар боғига тўпланиб, террорчилар қурбонига айланган ўнлаб инсонларни хотирлайди.
Доғистон раҳбарияти билан кечаси ўтказилган музокаралардан кейин, 10 январь тонгида террорчилар аксарият асирларни кўнгиллиларга алмашган — улар орасида депутатлар, Доғистон ҳукумати вакиллари ва журналистлар бор эди. 11 та автобусдан иборат колонна Чеченистон томон йўл олган. «Первомайс» қишлоғида автобуслар тўхтатилган ва музокаралар бошланиб, у 5 кун давом этган. Охир-оқибат артиллерия ва вертолётлардан фойдаланилган ҳолда штурм амалга оширилган.
18 январь куни операция якунланган. «Первомайск» қишлоғи бутунлай вайрон бўлган. Жангариларнинг бир қисми ўлдирилган, аммо катта қисми Чеченистон ҳудудига ўтиб кетишга муваффақ бўлган.
«Салман Радуев бошчилигидаги босқинчилар шаҳарга кирганида энди тонг отаётганди. Биринчи зарбани улар шаҳар аэродромида жойлашган вертолёт майдончасига амалга оширди, гранатомётларда улар иккита вертолётни яксон қилди. Шу билан бирга, улар Черемушка туманидаги ҳарбий қисм атрофига снайперларни жойлаштириб, уни блоклаб қўйди», — дея эслайди ўша кунги воқеа гувоҳларидан бири Аҳмед Саламов.
Саламовнинг сўзларига кўра, у «Прометей» телестудияси директори Камил Омаров билан шифохона томон йўл олган. Улар Радуев учрашишга розилик берган биринчи музокарачилар эди. Шундан кейинги барча, жумладан, «Первомайск»даги музокаралар ҳам Аҳмед Саламов ва Камил Омаров иштирокида ўтказилган. Айнан уларнинг қаҳрамонликлари сабаб асирларнинг ўлими олди олинган. «Шифохонадаги 3 минг асирдан фақат бир киши ҳалок бўлди. Қолганларни қутқаришга эришдик. Бу мамлакат тарихидаги шу каби омадли музокараларнинг биринчиси эди», — дейди Саламов.
Шифохонани эгаллаган жангарилар асирларни палаталардаги каравотларга ўтирғизиб чиққан. Террорчилар шифохона биносини миналаштириб чиққан, коридорлар бўйлаб ҳаракатланган одамлар ушбу миналарнинг симлари устидан ошиб ўтишга мажбур бўларди. Жангарилар жуда яхши қуролланган эди — барчасида автоматлар, пулемётлар, камарида эса камида 10 тадан гранаталар бўлган.
Шаҳарнинг тинч аҳолиси қарийб бир сутка давомида шифохонада тутиб турилган. Охир-оқибат террорчилар шаҳар ташқарисига — «Первомайск» қишлоғига чиқарилган ва ерда тўлиқ тор-мор келтирилган, асирлар эса озод этилган.
БМТнинг Нью-Йоркдаги штаб-квартираси
1951 йил 9 январь куни Нью-Йоркда Бирлашган Миллатлар Ташкилоти асосий биносининг тантанали очилиш маросими бўлиб ўтганди. БМТ штаб-квартираси — бу асосий ишчи органлар, ходимлар штати, бошқарув органларига расмий офис вазифасини ўтувчи бинолар мажмуасидир.
БМТ биносини яратиш учун бутун дунёдан турли архитекторлар, дизайнерлар ва муҳандислар таклиф этилган. Улар орасида Николай Басов, Оскар Нимеер, лойиҳалаштириш бўйича директор Макс Абрамович, муҳандис-консултант Владимир Бодянский, Ernst Кормье, бош архитектор Уоллес Гаррисон, Шарл Ле Корбюзе, Свен Маркелиус, Свайё, Лян Се Чен, шунингдек, консултантлар Энтони Антониадес, Метю Новики ва Эрнест Вайсман бор эди.
Ушбу гуруҳ 50 та турли лойиҳани тақдим этган ва охир-оқибат танлов Ле Корбюзенинг концептуал ғоясига келиб тўхтаган. Унинг чизмаларига кўра, бинолар мажмуаси турли услубларни ўзида бирлаштира олиши керак эди: офислар учун баланд шиша панеллар ва Бош ассамблея зали учун доирасимон паст қубба. БМТ штаб-квартирасини қуриш якунланган вақтда у Манхэттендаги энг замонавий архитектура биноси ҳисобланган.
Бино Манхэттеннинг шарқий қисмидаги 42 ва 48-кўчалар, Биринчи авеню ва Ист-Ривер орасида жойлашган. 7 гектар майдондаги 167 метрли БМТ биносини лойиҳалаштириш учун архитекторлар гуруҳига 6 йил вақт керак бўлган. БМТ штаб-квартираси географик жиҳатдан Нью-Йоркда жойлашган бўлса-да, у халқаро ҳудуд мақомига эга.
БМТ Нью-Йоркдаги биносидан ташқари яна учта ёрдамчи, минтақавий штаб-квартираларга эга: Женева, Вена ва Найробида. Аммо ташкилотнинг муҳим қарорлари айнан Нью-Йоркда қабул қилинади, чунки Бош ассамблея ва БМТ Хавфсизлик кенгашининг аксарият йиғилишлари шу ерда ўтказилади.
БМТнинг бутун дунё бўйлаб жойлашган ишчи органлари, агентликлари ва марказларида 170 та давлатдан 61 минг ходим фаолият юритади. Нью-Йоркдаги штаб-квартирага жами ташкилот ходимларининг учдан бир қисми сиғади.
БМТ расман 1945 йил 24 октябрь куни ташкил этилган; шу куни БМТ низоми аксарият давлатлар томонидан ратификация қилинган ва кучга кирган. Бирлашган Миллатлар номини АҚШ президенти Франклин Рузвельт таклиф этган ва у 1942 йил 1 январда Бирлашган Миллатлар декларациясида қўлланган — Иккинчи жаҳон уруши вақтида 26 та давлат вакиллари ўз ҳукуматлари номидан нацистлар блокига қарши ҳамкорликдаги курашни давом эттиришга келишиб олганди.
1945 йил 11 февраль куни Ялтада АҚШ, Буюк Британия ва СССР раҳбарлари Франклин Рузвельт, Уинстон Черчилл ва Иосиф Сталин «тинчлик ва хавфсизликни таъминлаш учун универсал халқаро ташкилот»ни таъсис этиш қарорини қабул қилади. 25 апрель куни 50 та давлат вакиллари Сан-Франсискода тўпланиб, БМТ низоми устида иш бошлайди.
Мексикадаги сапотекиларга тегишли ноёб хазина
1932 йил 9 январь куни Монте-Альбан харобаларидан Мексикада яшаган сапотеки ҳиндуларига тегишли XIII асрга оид хазина топилганди.
Монте-Альбан — Мексиканинг жанубий қисмида жойлашган машҳур археологик қўриқхона. Икки минг йил давомида у ерда Колумб томонидан Америка кашф этилгунга қадар энг йирик қадимий шаҳарлардан бири бўлган. Шаҳарнинг асл номи қандай бўлгани сақланиб қолмаган. Унинг ҳозирги номи Монте-Альбан бўлиб, кўп асрлар давомида ҳиндуларнинг йирик аҳоли пункти харобаларини яширган ўрмонли тепаликдан олинган.
1931 йилда у мексикалик археолог Алфонсо Касо томонидан топилган. Айрим олимлар ушбу архелогик топилмани Троянинг кашф этилиши билан таққослаган. Монте-Альбада яшаган одамлар қадимий ва фавқулодда ривожланган маданиятга эга бўлган. Шаҳар энг гуллаган вақтда у ерда 20 мингдан ортиқ инсон истиқомат қилган ва шаҳарнинг узунлиги 40 километрга етган. Уларнинг қабилалари сапотекилар деб аталган. Бу ердагилар ажойиб бино ва ибодатхоналар қура олган, тоғ биллурини қайта ишлай олган, ақл бовар қилмас даражадаги чиройли тилла тақинчоқларни ясаган.
Монте-Альбан сағаналари, айниқса, бутун дунё аҳолисида катта қизиқиш уйғотиб келади. Улар тошдан қурилган бўлиб, ҳар бирининг усти тош плита билан ёпилган. Бундай конструкция Жанубий Мексикада яшаган қадимги ҳиндулар ўз сардорлари ва худоларининг хизматчиларини кўмган ғорлар кўриниши ҳисобланади.
Монте-Альбандаги биринчи сағана 1931 йил кузда топилган. Кейинги йилнинг 9 январида эса Алфоно Касо дахмага кирган. У ерда 800 йил давомида ҳеч ким тегмаган улкан хазина бор эди. 500 дан ортиқ буюмлар, жумладан, ҳиндулар худоси Шип Тотекнинг олтиндан ишланган ниқоби ҳам. Ниқобнинг бурун ва яноқ қисмларига инсон териси тортилган. Шунингдек, тилла билакузуклар, марварид ва маржонлардан, нефрит, фируза, қаҳрабо, обсидиан ясалган тақинчоқлар ҳам бор эди.
Монте-Альбандаги энг сирли топилма — биллур инсон чаноғи бўлган. Тоғ биллури — ер юзидаги энг қаттиқ минераллардан бири ҳисобланади. 1970 йилда ушбу чаноқлар дунёнинг машҳур экспертлари томонидан ўрганилган. Улар чаноқ яхлит биллур бўлагидан қирқиб ишланган деган хулосага келган. Тоғ биллурини олмосдан бошқа нарса кеса олмасди. Аммо сапотекилар қандайдир усул билан уни қайта ишлашга муваффақ бўлганди.
«Кун хронологияси» лойиҳаси доирасида ҳар куни эрталаб соат 09:30 да ушбу санага боғлиқ энг муҳим ва қизиқарли воқеалар ёритиб борилади.
Изоҳ (0)