Беларусь Россия қуролли кучлари авиацияси билан қўшма машғулотлар ўтказади

Беларусь ва Россия қуролли кучлари қўшма тактик парвоз машғулотларини ўтказади. Бу ҳақда 8 январь куни Беларусь Мудофаа вазирлиги матбуот хизмати хабар берди.

Маълум қилинишича, 2023 йилнинг 16 январидан 1 февралига қадар минтақавий кучлар гуруҳининг авиация таркибий қисмига кирувчи Беларусь ва Россия қуролли кучларининг авиация бўлинмалари билан қўшма тактик парвоз машғулотлари бўлиб ўтади.

8 январь куни Россия Аэрокосмик кучларининг авиация компоненти Беларусга етиб келган. Машғулотларга Беларусь қуролли кучларининг барча полигонлари ва аэродромлари жалб этилади.

Беларусь президенти Александр Лукашенко 6 январь куни Украина ва Польша билан чегарадош Брест вилоятидаги Обуз-Лесновский полигонига ташриф буюрганди. Россия бўлинмаларидан бири ушбу полигонда жойлашган.

Россия ва Беларусь минтақавий қўшинлар гуруҳини кучайтиришда давом этмоқда, Беларусга Россиядан янги кучлар ва ҳарбий техника етиб келмоқда.

Мавзуга доир:

• «Тинчлик истасанг, урушга тайёрлан»: Лукашенко нега Украина яқинида ҳарбий машғулотлар ўтказаётганини айтди (видео)
• «Беларусга қарши тажовуз уюштирилиши мумкин» — Лукашенко
• Путин Лукашенкони Украинадаги урушга қўшилишга кўндира олмаган — ISW