Ҳиндистоннинг Мумбай шаҳрида жамоат жойларида кабутарларга ем бериб, боқиш тақиқланди. Бу қарор мамлакатда катта баҳсларга сабаб бўлмоқда. Бу ҳақда BBC хабар берди.
Маълум қилинишича, мамлакатда қарама-қарши томонларнинг баҳси тобора кескинлашмоқда. Бир томонда — соғлиқни сақлашни ўйлаётган мутасаддилар, бошқа томонда эса кабутар боқишни қадрият ва муқаддас амалиёт деб биладиган жамоалар.
Мумбайда сўнгги кунларда ўн йиллардан буён фаолият юритган кабутархоналар ёпилгач, юзлаб одамлар норозилик уюштириб, икки маротаба полиция билан тўқнашув юз берган. Айрим норозилар очлик эълон қилиш билан ҳам таҳдид қилган. Расмийлар бу қарорни кабутарлар нажаси соғлиққа хавф туғдираётгани билан изоҳламоқда. Тадқиқотларга кўра, кабутар нажаси нафас йўллари касалликлари, ўпка шамоллаши ва ҳатто ўпканинг қисқаришига олиб келиши мумкин. Ҳиндистон бўйлаб ушбу турдаги қушлар сони 2000 йилдан бери 150 фоизга ошгани айтилмоқда. Уларнинг ҳар бири атроф-муҳитни йилига 15 килограммгача ахлат билан ифлослантиради.
Деҳлида 2024 йили 11 ёшли бола ўпкада яллиғланиш келтириб чиқарадиган гиперсенситив пневмония касаллигидан вафот этган. Шифокорлар касалликнинг сабабини кабутар ахлати ва патлари билан изоҳлаган. Пулмонолог РС Пал BBC’га бундай ҳолатлар тез-тез учрашини таъкидлаб, шундай деди:
“Ҳатто кабутарни тўғридан-тўғри боқмасангиз ҳам, уларнинг дераза токчалари ёки балконларда қолган ахлати ушбу касалликни келтириб чиқариши мумкин”.
Унинг айтишича, кабутарлар билан доимий алоқада бўладиган одамларда бактериал, вирусли ва замбуруғли инфекциялар ҳам кўп учрайди. Шу хавотирлар сабаб Мумбай маъмурияти кабутар боқишни тақиқлаб, кабутархоналарни бузиш ишларини бошлаб юборган. Бироқ бу қарор қушларни боқишни ибодат сифатида қабул қиладиган Жаин жамоаси ва ҳайвон ҳуқуқлари ҳимоячиларининг кескин норозилигига сабаб бўлмоқда. Уларнинг фикрича, тақиқ туфайли минглаб кабутарлар очликдан қирилиб кетиши мумкин.
Мутахассислар эса мувозанатли ечим зарурлигини таъкидламоқда. Ҳайвон ҳуқуқлари ташкилотлари кабутар боқишни маълум соатларда — эрталаб ва кечқурун — рухсат этишни таклиф қилган. Бу орқали ҳам жамоат саломатлиги, ҳам одамларнинг қушларга меҳрини сақлаб қолиш мумкин. Деҳлилик фуқаро Сайид Исматнинг айтишича, у 40 йилдан бери кабутарларни боқиб келади ва уларни ўз оиласи деб билади.
“Улар айбдор эмас. Кабутарлар барча мавжудотлар ичида энг маъсумидир. Уларга озгина яхшилик бўлса бас”, деди Исмат.
Ушбу муаммо фақатгина Мумбайда мавжуд эмас. Мисол учун, Венецияда ҳам тарихий майдонларда кабутарларни боқиш тақиқланган. Бундан ташқари, Сингапурда ҳам бундай ҳаракатларга катта жарималар солинади. Нью Йорк ва Лондонда эса кабутар озиқлантириш зоналари тартибга солиниб, назорат остига олинган.
Ҳиндистон Олий суди пойтахт Деҳли кўчаларини дайди итлардан зудлик билан тозалаш бўйича қарор чиқаргани ҳақида хабар берилган эди. Қарорга мамлакатдаги хавотирли даражадаги қутуриш ҳолатлари ва ит ҳужумлари сабаб бўлган. Узоқ йиллардан бери давом этиб келаётган дайди итлар муаммоси 11 август куни тегишли қарор чиқарилиши билан якунланган.
Изоҳ (0)