Бразилия собиқ президенти, ўнгчи Жаир Болсонарунинг тарафдорлари 8 январь куни янги президент Луис Инасиу Лула да Сильвага қарши намойиш уюштириб, Бразилия Миллий Конгресси, президент саройи ва мамлакат Олий судига бостириб кирди. CNN маълумотларига кўра, улар полиция билан тўқнашган ва ушбу биноларга кириш йўлини тўсиб қўйишга уринган. 2019 йилдан буён Бразилия раҳбари бўлган Болсонару 2022 йилнинг кузида ўтказилган сайловларда мағлубиятга учраганди. Бир ҳафта олдин Бразилияда янги президентнинг инаугурацияси бўлиб ўтди – социалист Лула да Сильва учинчи марта президент лавозимига киришди.
Бразилиядаги воқеалар 2020 йил охиридаги АҚШ сайловларида мағлуб бўлган Дональд Трамп тарафдорларининг 2021 йил январида Капитолийга қилган ҳужуми билан таққосланмоқда.
Бразилия байроқларини кўтарган намойишчилар ҳукумат бинолари, жумладан Олий суд, Миллий конгресс ва давлат раҳбарининг ишчи қароргоҳи – Планалту саройига бостириб кирган. Улар ойналарни синдириб, вандализм ҳаракатларини амалга оширган. Полиция намойишчиларни тарқатиш учун кўзни ёшлатувчи газ ва шовқинли гранаталардан фойдаланган.
Ҳодиса пайтида Бразилия президенти Лула да Сильва пойтахтда бўлмаган – у сув тошқини оқибатларини текшириш учун Сан-Паулу штатига кетганди.
Штурм фонида Да Сильва ой охиригача Бразилия пойтахтида фавқулодда ҳолат эълон қилди ва тартибсизликларга қарши курашга федерал кучларни жалб этиш бўйича кўрсатма берди. Бразилия жамоат хавфсизлиги директори Андерсон Торресни ўз лавозимидан четлатилди. Торрес илгари Болсонару ҳукуматида Адлия ва жамоат хавфсизлиги вазири бўлган, ҳукумат уни ҳибсга олишни талаб қилган.
Сўнгги маълумотларга кўра, Бразилияда жами 400 киши ҳибсга олинган.
Изоҳ (0)