Германия полицияси мамлакатда терактлар уюштиришни режалаштирган 32 ёшли эронлик эркакни ҳибсга олди. Бу ҳақда Haaratz хабар берди.
Эрон фуқароси теракт уюштириш учун сианид ва рицин сотиб олиб, улар асосида заҳар тайёрлаган. Тергов доирасида гумонланувчининг Кастроп-Раукселдаги уйи тинтув қилинган. Эрон фуқароси «давлатга таҳдид солувчи жиддий террорчилик ҳаракатини» режалаштирганликда гумон қилинмоқда. Бу 6 ойдан 10 йилгача қамоқ жазосига олиб келиши мумкин.
«Германия исломий террор ташкилотларининг бевосита нишони бўлишда давом этмоқда», — дейди Германия ички ишлар вазири Нэнси Фаэзер.
Теракт уюштирилиши ҳақидаги маълумот «дўст давлат» хавфсизлик хизматидан келган, тафсилотларга аниқлик киритилмаган. Тахминларга кўра, гап АҚШ Федерал қидирув бюроси ҳақида кетмоқда. Тинтувлар давомида Эрон фуқаросининг укаси ҳам ҳибсга олинган. Рициннинг оз қисми 36-72 соат ичида ўлимга олиб келиши мумкин. Унга қарши маълум препаратлар мавжуд эмас.
Декабрь ойида Германия полицияси ҳукуматни ағдаришга тайёрланган 25 кишини ҳибсга олганди. Улар орасида келиб чиқиши 700 йиллик Ройсс князлик оиласидан бўлган шаҳзода Генрих XIII ҳам бор. Германия Ички ишлар вазирлиги 23 минг киши давлат тўнтаришига уринишда гумонланаётганини маълум қилган. Давлат тўнтаришини уюштирмоқчи бўлган гуруҳ мамлакат канцлери Олаф Шольцга ҳам суиқасд қилишни режалаштирган.
Изоҳ (0)