KFOR раҳбарияти (Kosovo Force — НАТО бошчилигида Косовода барқарорликни таъминлаш учун масъул бўлган халқаро кучлар) Сербия ҳукуматининг қисман тан олинган республикага Сербия хавфсизлик кучларини киритиш ҳақидаги илтимосини рад этди. Бу ҳақда Сербия президенти Александр Вучич Пинк серб телеканали эфирида маълум қилди.
«Улар Сербия армиясини Косово ҳудудига қайтаришга зарурат йўқ, деб ҳисоблаймиз деган мазмунда жавоб беришди», — таъкидлади Вучич. Унинг сўзларига кўра, KFOR БМТ Хавфсизлик Кенгашининг 1999 йилда қабул қилинган резолюциясига мувофиқ Косовода хавфсизликни сақлашга ўзлари масъул эканига ишора қилган.
Вучич KFOR’дан рад жавоби Рождество арафасида олинганини алоҳида таъкидлади. Сербия президенти бундай пайтда рад жавоби беришни номақбул деб атади.
Қисман тан олинган Косовода Рождество арафасида икки ёш сербга қилинган ҳужумни эслатар экан, Вучич KFOR ходимлари ўз ишини профессионал даражада бажармаётганини айтиб, уларни Ғарб қўлидаги воситалар деб атади.
Декабрь ойида Сербия KFOR миссияси қўмондонлигига Косово ва Метохияга серб армиясидан чекланган контингентни юборишга рухсат сўраб мурожаат қилганди.
Сербия расмийлари БМТ Хавфсизлик кенгашининг 1244-резолюцияси 4-бандида назарда тутилганидек, Косово ва Метохия ҳудудига минг нафаргача хавфсизлик кучларини қайтармоқчилигини таъкидлаган.
БМТ Хавфсизлик кенгашининг 1244-резолюцияси 1999 йил июнь ойида қабул қилинган. У Югославия федератив республикасида халқаро фуқаролик ва ҳарбий иштирокни тақиқлаган ҳамда Косовода БМТнинг Муваққат маъмурий миссиясини тузган. 4-бандда «Югославия ва Сербиянинг келишилган сондаги ҳарбий хизматчиларига ўз вазифаларини бажариш учун Косовога қайтишга рухсат берилган»и айтилади
Изоҳ (0)