Germaniyada teraktning oldi olindi: politsiya Eron fuqarosini hibsga oldi (video)

Germaniya politsiyasi mamlakatda teraktlar uyushtirishni rejalashtirgan 32 yoshli eronlik erkakni hibsga oldi. Bu haqda Haaratz xabar berdi.

Eron fuqarosi terakt uyushtirish uchun sianid va ritsin sotib olib, ular asosida zahar tayyorlagan. Tergov doirasida gumonlanuvchining Kastrop-Raukseldagi uyi tintuv qilingan. Eron fuqarosi “davlatga tahdid soluvchi jiddiy terrorchilik harakatini” rejalashtirganlikda gumon qilinmoqda. Bu 6 oydan 10 yilgacha qamoq jazosiga olib kelishi mumkin.

“Germaniya islomiy terror tashkilotlarining bevosita nishoni bo‘lishda davom etmoqda”, — deydi Germaniya ichki ishlar vaziri Nensi Faezer.

Terakt uyushtirilishi haqidagi ma’lumot “do‘st davlat” xavfsizlik xizmatidan kelgan, tafsilotlarga aniqlik kiritilmagan. Taxminlarga ko‘ra, gap AQSH Federal qidiruv byurosi haqida ketmoqda. Tintuvlar davomida Eron fuqarosining ukasi ham hibsga olingan. Ritsinning oz qismi 36-72 soat ichida o‘limga olib kelishi mumkin. Unga qarshi ma’lum preparatlar mavjud emas.

Dekabr oyida Germaniya politsiyasi hukumatni ag‘darishga tayyorlangan 25 kishini hibsga olgandi. Ular orasida kelib chiqishi 700 yillik Royss knyazlik oilasidan bo‘lgan shahzoda Genrix XIII ham bor. Germaniya Ichki ishlar vazirligi 23 ming kishi davlat to‘ntarishiga urinishda gumonlanayotganini ma’lum qilgan. Davlat to‘ntarishini uyushtirmoqchi bo‘lgan guruh mamlakat kansleri Olaf Sholsga ham suiqasd qilishni rejalashtirgan.